Прэзідэнт Уладзімір Зяленскі ў інтэрв’ю The Washington Post заявіў, што Украіна больш не можа губляць час з-за спрэчак у Кангрэсе ЗША наконт фінансавай дапамогі.
«Калі няма падтрымкі ЗША – значыць, у нас няма СПА, няма ракет Patriot, няма тэхнікі для радыёэлектроннай барацьбы, няма 155-міліметровых артылерыйскіх снарадаў. Гэта значыць, што мы будзем вяртацца, адыходзіць, крок за крокам, маленькімі крокамі», – сказаў ён.
Паводле прэзідэнта, для абароны лініі фронту ЗСУ патрэбныя 8000 артылерыйскіх снарадаў у дзень, а ўкраінскія вайскоўцы могуць дазволіць сабе толькі 2000. Гэта стварае пагрозу прарыву расейскіх войскаў у вялікія гарады і вымушае Украіну скарачаць лінію фронту.
«Мы спрабуем знайсці нейкі спосаб не адыходзіць», – працягнуў Зяленскі. Пасля захопу Расеяй Аўдзееўкі, зазначыў прэзідэнт, «мы стабілізавалі сітуацыю дзякуючы разумным крокам нашых вайскоўцаў». Калі фронт застанецца стабільным, Украіна зможа ўзброіць і навучыць новыя брыгады ў тыле для правядзення новага контрнаступлення пазней у 2024 годзе.
Зяленскі канстатаваў, што Украіне не хапае сродкаў СПА для абароны сваіх гарадоў і інфраструктуры.
«Без падтрымкі Кангрэса ў нас будзе вялікі дэфіцыт ракет. Гэта праблема. Мы нарошчваем уласныя сістэмы СПА, але гэтага недастаткова», – падкрэсліў ён.
Прэзідэнт зазначыў, што крытыкі выдзялення дапамогі Украіне не разумеюць, наколькі высокія стаўкі ў гэтай вайне. Паводле Зяленскага, «калі Украіна падзе, Пуцін падзеліць свет» на сяброў і ворагаў Расеі.
Нагадаем, у верасні 2023 года рэспубліканцы ў Кангрэсе заблакавалі ўключэнне дапамогі Украіне ў бюджэт. Развязаць гэтую праблему дасюль не ўдаецца, не зважаючы ні на хітрасці Белага дому, ні на кампрамісныя дамоўленасці ў Сенаце. Перамовы пра законапраект аб дапамозе Украіне трываюць і пакуль немагчыма прадказаць, колькі яшчэ часу спатрэбіцца дэмакратам і рэспубліканцам на тое, каб пра ўсё дамовіцца.
Глеб Нержын belsat.eu