Першы намеснік дзяржсакратара Савету бяспекі Беларусі Павел Муравейка выказаў думку, што Беларусь у адказ на забарону Літвою транзіту беларускіх тавараў праз сваю мяжу мае падставы прасекчы гэты калідор ваенным шляхам, піша «Вечерний Минск».
«Літва фактычна забараніла нам перамяшчаць свае тавары праз мяжу. Паводле ўсіх нормаў міжнароднага права такі крок адносіцца да эканамічнай агрэсіі. З гледзішча банальнай логікі мы маем усе падставы, каб прасекчы жыццёва важны для нас калідор моцай зброі. І ў іншых бы ўмовах нас бы ніхто ў свеце не асудзіў, думаю. Але не ў цяперашніх, калі на краіну ажыццяўляецца беспрэцэдэнтны ціск з боку Захаду», – заявіў Павел Муравейка на ідэалагічным семінары, арганізаваным Менгарвыканкамам.
Прадстаўнік Савету бяспекі паскардзіўся таксама, што Міжнародная арганізацыя працы падтрымала санкцыі супраць Беларусі і такім чынам заблакавала развіццё эканомікі нашай краіны, а Літва не выдае візаў беларусам і праз гэта правакуе транспартавы калапс на мяжы. Увядзенне санкцыяў Муравейка назваў «нядобрасумленнай канкурэнцыяй» і «захопам» месца Беларусі на сусветных рынках.
Намеснік дзяржсакратара Савету бяспекі заявіў, што беларуская эканоміка паказала сваю трываласць, аднак прызнаў і наяўнасць шэрагу праблемаў, у прыватнасці, з атрыманнем запчастак і пэўных рэсурсаў, са збытам прадукцыі.
«Часам узнікаюць праблемы з поўнай занятасцю працаўнікоў на месцах ці з выплатай заробкаў. Гэта аб’ектыўная рэчаіснасць. Інфармацыя такога плану сістэмна даводзіцца да кіраўніцтва краіны і рэгіёнаў. У выніку дзяржаўныя органы маюць магчымасць прыняць неабходныя меры рэагавання, каб стабілізаваць сітуацыю і не дапусціць эканамічнага калапсу», – сказаў Муравейка.
Таксама чыноўнік зазначыў, што ўскладнілася правядзенне трансакцыяў у доларах і еўрах.
«Санкцыйная палітыка зрабіла негатыўны ўплыў на функцыянаванне пэўных фінансавых сістэмаў. <…> Разам з тым больш інтэнсіўна сталі задзейнічацца магчымасці Кітаю: усё актыўней ажыццяўляецца ўзаемны разлік з замежнымі контрагентам у юанях. Удасканальваюцца механізмы аплаты беларускім суб’ектам гаспадарання здзейсненых паставак на праблемныя для нас рынкі праз банкі Кітаю», – распавёў Муравейка.
Марыя Міхалевіч belsat.eu