«Трохі дзіўна». У «Белай Русі» не ацанілі крытыку Азаронка гарадзенскай актывісткаю
Намесніца старшыні Гарадзенскага абласнога аддзялення «Белай Русі» Святлана Вараніца назвала прапагандыста Рыгора Азаронка ўтрапёным. У арганізацыі палічылі гэта «трохі дзіўным».
У апараце рэспубліканскага савету «Белай Русі» адрэагавалі на меркаванне сваёй гарадзенскай актывісткі.
«Мы крыху самі лічым гэта дзіўным», – заявілі ў арганізацыі, не ўдакладніўшы, ці чакаюць іхную паплечніцу нейкія наступствы, і адмовіўшыся ад далейшых каментароў.
Намесніца старшыні Гарадзенскага абласнога аддзялення «Белай Русі» Святлана Вараніца ў допісе ў сваім Telegram-канале адзначыла, што «не хоча азаронкаўшчыны і бондараўшчыны».
«Калі б у жыцці не сустракалася, не ведала, то пастанавіла б, што слухаю ўтрапёную асобу. Адчуванне, што ён стаў закладнікам вобраза на тэлевізіі, які ці то сам сфармаваў, ці то гэта камандная праца», – заявіла Вараніца, разважаючы пра праграму Рыгора Азаронка.
Яна пераказала размову са сваёй маці, якая папрасіла не чапаць прапагандыста, «хай сабе кажа, што хоча», адкрыта прыніжае і запужвае, і не вядома, «якія людзі на якіх пасадах яму за гэта б’юць у ладкі», таму могуць адпомсціць.
«Я маці разумею, толькі не магу не думаць пра сваіх дзяцей, унукаў, пра краіну. Я не хачу, каб мая краіна станавілася азаронкаўшчынай і бондараўшчынай, не хачу, каб іх запужвалі казематамі Лубянкі і новым Жданавым са Сталіным», – адзначыла праўладная актывістка.
