Юлія Дуднікава ў лістах у Міністэрства юстыцыі Расеі і пасольства Расеі ў Менску просіць забраць сына з беларускай турмы ў расейскую калонію. Яна не можа атрымаць спаткання з Ягорам, бо жыве з малодшым сынам у Расеі, паведамляе Бі-Бі-Сі.
Маці палітычнага вязня просіць расейскае ведамства скарыстацца дамоваю паміж Беларуссю і Расеяй, якая дазваляе перадаваць асуджаных для далейшага адбывання пакарання ў краіну, грамадзянамі якой яны ёсць.
Менскі гарадскі суд у лістападзе летась прыгаварыў 22-гадовага расейца Ягора Дуднікава да 11 гадоў калоніі ўзмоцненага рэжыму. З лістапада 2020-га да свайго затрымання ў траўні 2021-га Дуднікаў агучваў ролікі для апазіцыйнага тэлеграм-каналу. Яго прызналі вінаватым у двух артыкулах Крымінальнага кодэксу: «Распальванне варожасці» і «Заклікі ў інтэрнэце да дзеянняў супраць нацыянальнай бяспекі».
Ягора адправілі адбываць пакаранне ў бабруйскую ПК № 2. Адміністрацыя калоніі неаднаразова карала маладзёна за парушэнні правілаў і ў выніку дамаглася ягонага пераводу ў турму. Імаверна, гэтак КДБ адпомсціў Дуднікаву за публічныя заявы, як пасля арышту ў траўні 2021 года ў яго выбівалі прызнальныя паказанні.
Раней Ягор распавядаў, што пры затрыманні яго білі нагамі і рукамі, пасля ператрусу надзелі на галаву мяшок і сказалі, што паедуць закопваць.
Маці вязня ўпэўненая: такі ціск звязаны з тым, што ў Ягора «палітычны» артыкул.
«Сталі ўстаўляць палкі ў колы і чапляцца да ўсякага глупства: пыл не так выцер, не так устаў, не так сеў. І ў выніку ўсё запісвалі ў парушэнні, казалі пісаць тлумачальныя. Ён пісаў іх, каб не ісці на канфлікт, а па факце яны павярнуліся супраць яго», – распавяла Юлія Дуднікава.
У чэрвені 2022 года мясцовы суд пастанавіў змяніць пакаранне Ягору з узмоцненага рэжыму на турэмны на 3 гады.
Алена Рувіна belsat.eu