На YouTube выйшаў дакументальны фільм опернай спявачкі Маргарыты Ляўчук пра катаванне колерамі дзяржаўнай сімволікі. Стужка называецца «Кроў на траве» – гэтак сын адной з палітзняволеных некалі апісаў чырвона-зялёны сцяг.
«Гэта мой дэбют у ролі аўтаркі, сусцэнарысткі, супрадусаркі і гераіні ў кадры поўнага метра», – напісала Маргарыта Ляўчук у сваім Instagram.
Яна адзначыла, што мэтавая аўдыторыя – не толькі беларусы, але і «увесь свет»:
«Праз сваю творчасць і свае праекты хачу распавесці ўсяму свету, хто такія беларусы, што робіць рэжым Лукашэнкі з тымі, хто прагне жыць у вольнай і дэмакратычнай краіне. Спадзяюся, што разам мы зможам данесці важныя наратывы як самім беларусам, так і прадстаўнікам іншых нацыяў і краінаў».
«Кроў на траве» – гэта фактычна даследаванне пытання, ці магчымы візуальны гвалт дзяржаўнай сімволікаю. Аўтарка распытвае пра гэта дызайнераў, стылістку, урбаніста, а таксама былых палітзняволеных беларусаў.
У фільме закранаецца гісторыя чырвона-зялёнага сцяга, аспекты якой замоўчвае альбо скажае прапаганда рэжыму, а таксама падаецца гісторыя паходжання арнаменту на беларускім сцягу, паведамляе анатацыя да стужкі.
На паказе фільму ў Вільні 27 чэрвеня Маргарыта Ляўчук прызналася, што ёй чырвона-зялёны сцяг не быў блізкі яшчэ да пратэстаў 2020 года. Спявачка згадала, як у 2017-м выступала на Тэнэрыфэ і за спінай на экране паказалі гэты сцяг. У выніку ад разгубленасці яна не вельмі добра выканала першую арыю, піша «Наша ніва».
Спадарыня Маргарыта цяпер заканчвае магістратуру ў ЕГУ. Тэму гвалту дзяржаўнай сімволікаю яна даследавала ў сваёй магістарскай працы, і стужка сталася вынікам гэтага даследавання.
Сяргей Крот belsat.eu