Прапагандысты распавялі пра беларуса, які ваюе за РФ. У Беларусі ён уцёк з «хатняй хіміі»
Газета «Мінская праўда» апублікавала заметку пра беларуса Аляксея Яршова, які ваюе супраць Украіны на баку Расеі. Аднак прапагандысты ўтаілі важны факт: у 2017 годзе за ўдзел у вайне на Данбасе Яршоў быў асуджаны Віцебскім абласным судом.
«Мінская праўда» са спасылкай на данецкае прапагандысцкае выданне «Знамя Донбасса» распавяла пра капітана Аляксея Яршова (пазыўны «Беларус»), начальніка службы БПЛА 110-й гвардзейскай мотастралковай брыгады 1-га Данецкага армейскага корпуса. У заметцы адзначаецца, што на вайне Яршоў з 2016 года. Ён з Беларусі, адсюль і пазыўны. Служыў у войску, у 228-м палку радыёэлектроннай барацьбы ў Полацку.
Прапагандысты пры гэтым не захацелі распавесці пра яшчэ адзін важны факт біяграфіі Яршова. Справа ў тым, што восенню 2017 года Віцебскі абласны суд прысудзіў яму 2 гады «хатняй хіміі» за ўдзел у вайне на Данбасе. Ягоныя дзеянні былі кваліфікаваныя паводле арт. 361-3 Крымінальнага кодэксу («Удзел ва ўзброеным канфлікце на тэрыторыі замежнай дзяржавы без прыкмет найміцтва»). Яршоў стаў увогуле першым беларусам, які быў асуджаны паводле гэтага артыкулу, які спецыяльна ўключылі ў КК у сувязі з вайной на Данбасе (усяго вядома пяць такіх выпадкаў).
Яршоў тады распавёў у інтэрв’ю «Белсату», што вярнуўся з вайны дадому ў красавіку 2017 года. Неўзабаве да яго прыйшлі супрацоўнікі КДБ. Ён быў узяты пад варту і да суду цягам некалькіх месяцаў утрымліваўся ў СІЗА. Суд адбываўся ў закрытым рэжыме, бо, як сцвярджаў Яршоў, «там было шмат сакрэтных дадзеных». Баявік атрымаў надзвычай мяккі прысуд: абмежаванне волі без накіравання ў папраўчую ўстанову. Хаця арт. 361-3 прадугледжвае пакаранне ў выглядзе пазбаўлення волі тэрмінам ад 2 да 5 гадоў.
Яршоў пасля вынясення выраку быў вызвалены з-пад варты. Амаль адразу пасля гэтага ён уцёк з «хатняй хіміі» і зноў паехаў на Данбас, пра што сам распавёў журналістам.
Глеб Нержын belsat.eu
