У Еўразвязе назвалі сацсетку Х Маска галоўнаю платформаю расейскай дэзынфармацыі
Сацыяльную сетку X (раней Twitter) Ілана Маска назвалі найбуйнейшым каналам распаўсюду дэзынфармацыі. Пра гэта заявіла віцэ-прэзідэнтка Еўракамісіі Вера Ёўрава, паведамляе «The Bell» са спасылкаю на «Bloomberg».
«Гэтая зброя масавых маніпуляцыяў коштам шмат мільёнаў еўраў, скіраваная і на расейцаў, і на ўвесь астатні свет. Буйныя кантэнтавыя платформы абавязаныя перадухіляць гэтую рызыку. Асабліва ў кантэксце імавернай актыўнасці Крамля – і не толькі – перад выбарамі ў ЕЗ», – заявіла Вера Ёўрава.
Асабліва гэта трэба ўлічваць у кантэксце таго, што Крэмль ды іншыя будуць актыўныя перад еўрапейскімі выбарамі, дадала віцэ-прэзідэнтка Еўракамісіі.
На думку Ёўравай, менавіта ў X (раней Twitter) «самая вялікая доля допісаў з скажэннямі і беспасярэдняю дэзынфармацыяй». Асаблівая актывізацыя расейскіх наратываў у сацыяльнай сетцы адзначаная перад нядзельнымі выбарамі ў Славаччыне, дзе ёсць умоўна прарасейскі кандыдат.
Таксама Еўразвяз заклікаў платформы Крамянёвай даліны павысіць сваю пільнасць у барацьбе з расейскаю «вайной ідэяў».
Нядаўна Еўракамісія выпусціла справаздачы пра стан барацьбы з дэзынфармацыяй на асноўных буйных лічбавых платформах, як Meta, Google, TikTok, X ды іншых. Большасць асноўных платформаў пагадзілася працаваць з ЕЗ над добраахвотным кодэксам паводзінаў, мэта якога – устанавіць стандарты для правярання фактаў ды іншых захадаў.
Алена Рувіна belsat.eu
