26–27 студзеня абраная прэзідэнтка Беларусі Святлана Ціханоўская будзе з візітам у Харватыі. Гэта першы ейны візіт у гэтую балканскую краіну. Раніцай 26 студзеня яна сустрэлася з міністрам замежных справаў Харватыі Горданам Гырлыч-Радманам, паведамляе прэс-служба Святланы Ціханоўскай.
Падчас прэс-брыфінгу з міністрам замежных справаў Харватыі Святлана Ціханоўская яшчэ раз падкрэсліла, што Беларусь – не Расея, і заклікала адрозніваць беларусаў ад рэжыму.
«Поўную адказнасць за ўдзел у вайне супраць Украіны нясе дыктатар Лукашэнка, бо 86 % беларусаў – супраць вайны», – заявіла Святлана Ціханоўская.
У праграме візіту Святланы Ціханоўскай у Харватыю таксама сустрэча з прэм’ер-міністрам гэтай краіны Андрэем Плэнкавічам і спікерам парламенту Горданам Яндракавічам.
Прэс-служба беларускай лідаркі паведамляе, што падчас сустрэчаў Ціханоўская будзе абмяркоўваць падтрыманне Харватыяй дэмакратычнай Беларусі ў Еўрапейскім Звязе, у Радзе Еўропы і АБСЕ.
«Таксама будуць абмеркаваныя практычныя пытанні: як перадухіліць удзел беларускіх войскаў у вайне супраць Украіны і дапамагчы беларускім партызанам і добраахвотнікам; як узмацніць ізаляцыю Лукашэнкі на міжнароднай арэне, але пры тым падтрымаць беларускі народ унутры краіны і тых, хто мусіў зʼехаць у сувязі з палітычным пераследам», – паведамляе прэс-служба Святланы Ціханоўскай.
Мяркуецца, што беларуская дэмакратычная лідарка паўдзельнічае і ў цырымоніі ўскладання кветак да помніку Радзіме і выступіць у Харвацкім акадэмічным звязе.
Напярэдадні візіту ў Харватыю Святлана Ціханоўская правяла шэраг сустрэчаў на высокім узроўні ў Польшчы, у прыватнасці, з міністрамі замежных справаў, адукацыі і фінансаў Польшчы.
Зміцер Міраш belsat.eu