У Беларусі працягваюцца суды, ператрусы і затрыманні – машына рэпрэсій не спыняецца. А вось польскі суд адмовіўся выдаць Беларусі заснавальніка сеткі каналаў «Nexta» Сцяпана Пуцілу. Падводзім вынікі чарговага інфармацыйнага дня на «Белсаце».
- Суд у Варшаве адмовіўся выдаваць у Беларусь заснавальніка «Nexta» Сцяпана Пуцілу.
Суддзя пастанавіў, што недапушчальна выдаваць чалавека беларускаму рэжыму «толькі за тое, што гэтага хоча дыктатар-псіхапат».
- Расейскі журналіст Дудзь зняў фільм пра беларусаў за мяжой – «Как жить, если лишают родины».
«Я лічу, што кіраўнікі нашай краіны ўспрымаюць эміграцыю як сваю перамогу», – тлумачыў Дудзю журналіст Мікіта Мелказёраў, якога жартам называюць «беларускім Дудзём».
- На 19 гадоў калоніі асудзілі падпалкоўніка галоўнага разведвальнага ўпраўлення Міністэрства абароны Дзмітрыя Самсонава. Яго вінавацілі ў тым ліку ў здрадзе дзяржаве. Інфармацыі мала. Суд праходзіў у закрытым рэжыме.
- Фракцыя «Адзіная Расея» звярнулася да кіраўніцтва РФ з просьбаю аказаць ваенную дапамогу так званым Луганскай і Данецкай народным рэспублікам:
“Нас турбуе пытанне абароны жыцця расейскіх грамадзянаў і суайчыннікаў, якія там пражываюць”.
- Сямейную пару арыштавалі за навагодні салют. Агулам мужу і жонцы далі 28 сутак арышту.
«Пікетавалі шляхам запуску піратэхнічнага вырабу, згодна з раней размешчанымі ў дэструктыўных тэлеграм-каналах заклікамі».
- У дырэктара Магілёўскага праваабарончага цэнтру Уладзіміра Краўчанкі у выніку ператрусу канфіскавалі цацачны пісталет сына. Але потым вярнуліся і затрымалі праваабаронцу. Пенсіянерка Алена Гнаўк не выйшла на волю пасля 15 сутак арышту – на яе завялі яшчэ дзве крымінальныя справы…
- І нарэшце пазітыў (ці не?). Старшыня Нацыянальнай Акадэміі навук Уладзімір Гусакоў заявіў, што прататып беларускай вакцыны супраць каронавіруса ўжо гатовы…
ЗК belsat.eu