На мінулым тыдні прадстаўнікі Офісу Святланы Ціханоўскай Анатоль Лябедзька і Віталь Малчанаў сустракаліся з групай «За дэмакратычную Беларусь» у Сейме Латвіі. Вынікам сустрэчы стала рашэнне Камісіі па народнай гаспадарцы Сейма Латвіі выключыць з «чорнага спісу» аўтамабілі з беларускімі нумарамі, паведамляюць у Офісе Ціханоўскай.
«Падчас сустрэчы ў Сейме Латвіі мы знайшлі патрэбныя словы і аргументы, якія пераканалі дэпутатаў выключыць згадку грамадзянаў Беларусі з праекту закона аб дарожным руху. На пасяджэнні Камісіі гэтая папраўка атрымала падтрымку і цяпер мы можам выключыць гэта пытанне са спісу праблемаў беларусаў у Латвіі», – паведаміў Анатоль Лябедзька, дарадца Святланы Ціханоўскай па канстытуцыйнай рэформе і міжпарламенцкай супрацы.
Таксама ён падкрэсліў важнасць стварэння групаў «За дэмакратычную Беларусь» у нацыянальных Парламентах, бо з іх дапамогай можна вырашаць праблемы беларусаў замежжа.
У верасні паведамлялася, што Міністэрства юстыцыі Латвіі рыхтуе законапраект, згодна з якім хацелі забараніць перабыванне транспарту з беларускімі і расейскімі нумарамі на тэрыторыі краіны. Калі б гэтыя папраўкі прынялі, то аўтамабілі з беларускімі нумарамі неабходна было тэрмінова перарэгістраваць або вывезці з краіны, у адваротным выпадку іх маглі адбіраць у ўладальнікаў «на карысць Украіны».
Алена Рувіна belsat.eu