Менскі абласны суд прысудзіў 6 гадоў калоніі агульнага рэжыму палітзняволенай і былой супрацоўніцы пракуратуры Наталлі Лашч. Пра гэта стала вядома праваабаронцам «Вясны». Наталля праходзіла ў справе «Чорнай кнігі Беларусі».
Наталлю Лашч вінавацілі ў «незаконным зборы і распаўсюдзе інфармацыі аб прыватным жыцці» (арт. 179 КК) і ў «распальванні сацыяльнай варожасці» (ч.3 арт. 130 КК) – нібыта за «зліў» інфармацыі ў «Чорную кнігу Беларусі» (ЧКБ). Прысуд палітзняволенай агучыў Анатоль Дабрадзей.
Наталля Лашч – юрыстка, яна працавала ў пракуратуры Фрунзенскага раёну Менску. Жанчына была затрыманая 17 жніўня 2022 года ў справе ЧКБ. На пачатку верасня 2022 года яе прызналі палітычнай зняволенай. Суд над ёй распачаўся яшчэ 25 студзеня 2023 года. 1 сакавіка так званы суддзя Анатоль Дабрадзей прызнаў Наталлю Лашч вінаватай і прысудзіў ёй 6 гадоў калоніі агульнага рэжыму.
Як паведамляюць праваабаронцы, у хуткім часе Наталля Лашч пачне адбываць тэрмін у гомельскай жаночай калоніі № 4.
На 23 чэрвеня, паводле праваабарончага цэнтру «Вясна», у Беларусі былі прызнаныя палітвязнямі 1496 чалавек. Ініцыятыва Dissidentby налічвае 1742 чалавекі, якія знаходзяцца за кратамі ў Беларусі з палітычных прычын.
Зміцер Міраш belsat.eu
