Рада нацыянальнай бяспекі Украіны пастанавіла ўвесці рэжым надзвычайнага становішча па ўсёй краіне, акрамя Данецкай і Луганскай вобласцяў. Гэтае рашэнне цягам 48 гадзінаў мае зацвердзіць Вярхоўная Рада.
Тым часам у раёнах Украіны на межах з РФ і Беларуссю ўведзеныя дадатковыя рэжымныя абмежаванні. У Данецкай і Луганскай вобласцях плануецца ўвядзенне ваеннага становішча.
Рада нацыянальнай бяспекі і абароны Украіны пастанавіла ўвесці надзвычайнае становішча на ўсёй тэрыторыі Украіны, акрамя Данецкай і Луганскай вобласцяў, паведаміў на брыфінгу сакратар РНБА Аляксей Данілаў.
Увядзенне надзвычайнага становішча яшчэ мае зацвердзіць Вярхоўная Рада на працягу 48 гадзінаў. Рэжым надзвычайнага становішча ўводзіцца на 30 дзён і можа быць падоўжаны.
«У залежнасці ад таго, наколькі будуць лічыць мэтазгоднымі правядзенне рэчаў, запісаных у заканадаўства пра прававы рэжым надзвычайнага становішча, абласныя камісіі, у якія будуць уваходзіць прадстаўнікі ўсіх органаў дзяржаўнай і гарадской улады, змогуць прымаць тыя ці іншыя рашэнні. Што гэта можа быць? Узмацненне аховы грамадскага парадку і аб’ектаў, якія забяспечваюць жыццядзейнасць насельніцтва і народнай гаспадаркі. Гэта могуць быць пэўныя абмежаванні руху транспарту. Гэта можа быць дадатковы агляд транспарту, праверка тых ці іншых дакументаў у фізічных асобаў. Гэта прэвентыўныя пытанні – дзеля таго, каб у краіне захоўваўся спакой, працавала эканоміка», – зазначыў Аляксей Данілаў.
Пра каменданцкую гадзіну гаворкі цяпер няма, яе змогуць уводзіць у кожным канкрэтным рэгіёне ў выпадку неабходнасці.
У Данецкай і Луганскай вобласцях надзвычайнае становішча было ўведзенае яшчэ ў 2014 годзе і з таго часу не адмянялася.
21 лютага 2022 года прэзідэнт Расеі Уладзімір Пуцін прызнаў незалежнасць акупаваных тэрыторыяў Данбасу – ДНР і ЛНР.
Уладзімір Зяленскі раней абяцаў, што надзвычайнае становішча будзе ўведзенае ва Украіне ў выпадку поўнамаштабнай вайны з Расеяй.
ГГ belsat.eu