Удзельнікі саміту ЕЗ не прынялі практычных рашэнняў наконт прапановы Еўракамісіі ўвесці забаронныя тарыфы на аграрную прадукцыю Расеі і Беларусі, піша ТАСС.
«Еўракамісія агучыла сваю прапанову па тарыфах, якія прынялі да ведама дзяржавы ЕЗ. Гэтая тэма зараз будзе абмяркоўвацца ў Савеце ЕЗ [на ўзроўні міністраў]», – заявіла крыніца агенцтва.
Для прыняцця новага рашэння можа спатрэбіцца шмат часу – ад тыдня да некалькіх месяцаў, у залежнасці ад таго, як падзеляцца меркаванні членаў ЕЗ. Зрэшты, аднагалоснага рашэння не патрэбна, дастаткова большасці галасоў.
Тым часам у Беларусі паспяшылі заявіць, што ім усё адно: нібыта ўвазныя пошліны ад Еўразвязу на зерне не нашкодзяць беларускай эканоміцы. Аб гэтым раней расказалі ў Міністэрстве сельскай гаспадаркі і харчавання рэспублікі. У міністэрстве адзначылі, што Беларусь у прынцыпе не экспартуе зерне ў ЕЗ, а толькі прадукты перапрацоўкі. І ў малой колькасці.
«ЕЗ – гэта не наш асноўны рынак па прадукцыі перапрацоўкі», – растлумачылі сваю пазіцыю ў ведамстве.
Еўракамісія плануе ўвесці пошліны на зерне з Беларусі і Расеі. За кожную тону будзе налічвацца па 95 еўра. Таксама пошліны ў памеры 50 працэнтаў увядуць на насенне алейных культур і прадукты іх перапрацоўкі.
Гэтыя меры прывядуць да таго, што кошты на беларускае і расейскае зерне павялічацца мінімум на 50 %. З-за гэтага попыт на іх упадзе. Абмежаваць імпарт збожжавых з Беларусі і Расеі патрабавалі Польшча і краіны Балтыі.
Таксама кіраўнік Еўракамісіі Уршуля фон дэр Ляен заявіла, што ЕС не хоча, каб Беларусь і Расія атрымлівалі які-небудзь прыбытак ад аграрнага рынку ЕС.
«Гэта значыць, накладваючы тарыфы на зерне, мы падрываем яго [АПК Беларусі і Расеі] канкурэнтаздольнасць. Мы не хочам, каб расійскае зерне ўплывала на наш рынак», – заявіла фон дэр Ляен.
Пры гэтым захаваецца магчымасць транзіту збожжа праз ЕЗ, каб не падрываць харчовую бяспеку краін глабальнага Поўдня.
Ася Саковіч belsat.eu
