Zerkalo.io са спасылкай на інфармацыю ад некалькіх не звязаных паміж сабой крыніцаў паведамляе, што затрыманы генеральны дырэктар БелАЗу Сяргей Нікіфаровіч.
Як распавялі крыніцы выдання, Сяргей Нікіфаровіч быў затрыманы ўвечары 15 снежня. Суразмоўцы журналістаў сцвярджаюць, што з таго часу топ-менеджар заводу застаецца ў СІЗА КДБ. Адная з магчымых прычынаў – карупцыя.
На заводзе актыўна абмяркоўваюць гэтую тэму, аднак ніякіх афіцыйных заяваў да гэтага часу не было.
Журналісты Zerkalo.io некалькі дзён спрабавалі звязацца з гендырэктарам. У панядзелак 18 снежня журналіст пад выглядам звычайнага беларуса патэлефанаваў у прыёмную Нікіфаровіча. Там заявілі, што яго на працоўным месцы няма, ён нібыта на нарадзе. У сераду, адказваючы на адкрытае пытанне, ці затрыманы Нікіфаровіч, сакратарка сказала, што ёй нічога пра гэта не вядома.
21 снежня пад выглядам прадстаўніка аднаго з расейскіх партнёраў прадпрыемства журналістка Zerkalo.io патэлефанавала ў ягоную прыёмную і паспрабавала прызначыць сустрэчу. «Да Новага года дакладна няма. Сяргей Алегавіч у адпачынку. Вось пасля і тэлефануйце, калі ласка», – заявіла сакратарка гендырэктара.
Сяргей Нікіфаровіч нарадзіўся ў 1979 годзе ў Жодзіна. БелАЗ ён узначаліў у верасні 2020 года.
Адзначым, што на сайце БелАЗу Сяргей Нікіфаровіч усё яшчэ пазначаны як генеральны дырэктар, хаця часцяком прадпрыемствы Беларусі прыбіраюць дадзеныя апальных топ-менеджараў неўзабаве пасля арышту.
Глеб Нержын belsat.eu