Каталікам тут не месца. У Смаргоні напалі на касцёл, пабілі фігуру Марыі і вырвалі крыж

У Смаргоні ўночы на 21 снежня адбыўся напад на касцёл Святога Міхала Арханёла. Вандал затрыманы, але святар просіць маліцца за яго. Пра гэта паведамляе выданне «Светлы шлях».

Пабітая скульптура Дзевы Марыі ў Смаргоні.

Фота: shliah.by

Як распавёў ксёндз Артур Ляшнеўскі, каля гадзіны ночы ён прачнуўся ад гучных крыкаў і грукаў у дзверы і вокны. Невядомы мужчына, нецэнзурна лаючыся, наносіў удары цяжкім прадметам па машынах святароў, а таксама разбіў фігуру Маці Божай і вырваў металічны крыж з рук Міхала Арханёла. Мужчына неаднаразова паўтараў, што Каталіцкая царква павінна адсюль «прыбірацца», і што ёй тут не месца.

Статуя Міхала Арханёла, у якога вырвалі крыж.

Фота: shliah.by

Святар выклікаў міліцыю. Нападніка затрымалі. Ім аказаўся мясцовы жыхар. За вандалізм пачатая крымінальная справа паводле частцы 1 артыкула 339 КК («Хуліганства»).

Пабіты пастамент скульптуры Дзевы Марыі ў Смаргоні.

Фота: shliah.by

Разбітую постаць Маці Божай і вырваны крыж ксяндзы перанеслі ў касцёл і змясцілі каля алтара. Святар просіць вернікаў маліцца за пакаянне чалавека, які дазволіў сабе вандалізм і блюзнерства.

Пабітыя машыны святароў у Смаргоні.

Фота: shliah.by

Некалькі месяцаў таму смаргонскі касцёл ужо падвяргаўся падобным нападкам: былі выкрадзеныя грошы з святыні і разбітая фігура Маці Божай, якая знаходзілася каля крыжа.

Адзначым, што напад адбыўся напярэдадні свята Божага Нараджэння, якое адзначаецца 25 снежня.

Якуб Хруст belsat.eu