Дэпутат Дзяржаўнай думы ад «Адзінай Расеі» генерал Андрэй Гурулёў заявіў, што для ўсіх, хто «ідзе супраць дзяржавы» неабходна адрадзіць сістэму ГУЛАГ. Пра гэта ён заявіў у эфіры тэлеканалу «Царьград».
«Мне зараз кажуць: «Ты хочаш зладзіць зноў ГУЛАГ». Ну, я сапраўды кажу, што жадаю, каб тыя, хто сёння шкодзіць нашай Радзіме тут усярэдзіне, радасна махалі кайлом у раёне Калымскага тракту. Гэта праўда. І не толькі я хачу, і народ хоча гэтага», – заявіў дэпутат.
Гэта не першая падобная прапанова Андрэя Гурулёва. У 2023 годзе ён прапаноўваў «уводзіць паняцце «вораг народу», ворагі ёсць, а паняцця няма» і казаў, што хоча вярнуць сталінскія рэпрэсіі.
А пазней дэпутат прапаноўваў, каб 20% расейцаў, «уся вось гэтая гнілата, якая засталася», была «калі не ізаляваная, то хаця б неяк знішчаная».
Галоўнае ўпраўленне папраўча-працоўных лагераў (ГУЛАГ) ажыццяўляла кіраўніцтва месцамі зняволення ў 1930–1959 гадах. У ім сярод іншага актыўна выкарыстоўвалася прымусовая праца зняволеных. Паводле афіцыйных звестак, усяго праз сістэму лагераў, турмаў і калоніяў АДПУ і НКУС у 1921–1953 гадоў прайшло 7,6 млн асобаў.
Якуб Хруст belsat.eu
