Каманда ініцыятывы «Arm Women Now» сумесна з інструктарамі і курсантамі вучэбна-трэніровачнага добраахвотнага фармавання «Легіён-Д» правялі ў Кіеўскай вобласці тэставанне ўзораў уласнай формы, якая была ўзятая за аснову пры распрацоўцы жаночай палявой формы Міністэрствам абароны Украіны. Паглядзіце, як выглядае жаночая ўніформа, якая хутка будзе ўведзена ў ЗСУ.
«Праблема гендарна-арыентаванага забеспячэння ЗСУ застаецца адкрытай. Нашым абаронцам патрэбна функцыянальная і зручная вайсковая форма» – адзначылі арганізатары праекту.
З мінулага года ініцыятыва «Arm Women Now» сваімі сіламі падрыхтавала і адправіла на фронт больш за 4200 камплектаў жаночай формы.
Цяпер жа «Arm Women Now» разам з Міністэрствам абароны Украіны працуе над распрацоўкай летняй палявой формы адзення і бялізны для жанчын-ваеннаслужачых.
«Зручная вайсковая форма – адзін з важных складнікаў, таму што нашыя жанчыны-абаронцы яе носяць кожны дзень», – распавёў Намеснік міністра абароны Украіны Дзяніс Шарапаў у супрацы з праектам.
Агата Квяткоўская belsat.eu
