У шмат якіх чатах з’яўляецца паведамленне ад імя дэмакратычных сілаў, што запушчаны план «Перамога 2.0». Інфармацыя не адпавядае рэчаіснасці, заяўляюць прадстаўнікі розных дэмакратычных структураў і папярэджваюць пра небяспеку пераходу па спасылках з фэйкавага паведамлення.
Сёння ў сеціве з’явіўся допіс разам з відэа, у якім гаворыцца, што АПКБ мае інфармацыю, быццам выбары ў Расеі стануць «першым этапам разбурэння крамлёўскага рэжыму пад націскам ЗСУ і легіёну «Свабодная Расея». У сувязі з гэтым нібыта беларускія дэмакратычныя сілы мусяць быць гатовыя да «акна магчымасцяў для рашучых дзеянняў у выпадку наступлення крызісу ў РФ», а таму нібыта «лідару беларускага падполля і кіраўніку «BYPOL» Аляксандру Азараву даручана… арганізаваць выкананне плану [плану «Перамога»] для дасягнення мэтаў вызвалення Беларусі».
У «BYPOL» у сваю чаргу заявілі, што гэта фэйк, «створаны прадстаўнікамі рэжыму».
У сацыяльных сетках Святлана Ціханоўская таксама кажа, што паведамленне пра запуск плану «Перамога» фэйкавае. Яна заклікала беларусаў быць пільнымі і не пераходзіць па спасылках у фэйкавым паведамленні:
«Ні ў якім разе не пераходзьце па спасылках у гэтым паведамленні. Гэты «зварот» зроблены з мэтаю дэананімізацыі карыстальнікаў».
Сапраўды, відаць, што канал створаны 13 сакавіка, тады ж дадалі амаль усе паведамленні.
Раман Шавель belsat.eu
