Міністарка працы падлічыла, што сярэдняя пенсія ў лютым будзе складаць у Беларусі 811 рублёў
Міністарка працы і сацыяльнай абароны Беларусі Ірына Касцевіч разлічвае, што сярэдняя пенсія ў лютым 2024 года будзе складаць 811 рублёў. Такімі прагнозамі яна падзялілася падчас жывога эфіру на дзяржаўным тэлебачанні.
«Паводле экспертных ацэнак, мы чакаем сярэднюю пенсію ў лютым 811 рублёў. Гэта плюс 75 рублёў у сярэднім», – сказала Ірына Касцевіч.
Прыбаўка да пенсіі, паводле міністаркі, вынікае з указу Аляксандра Лукашэнкі, што прадугледжвае з 1 лютага прырост пенсіяў на 10 %. Дакумент быў падпісаны Лукашэнкам напярэдадні Новага года.
Міністарка працы падкрэсліла, што 811 рублёў – гэта сярэдняя лічба. Маўляў, кожны пенсіянер атрымае розную суму, бо ў разліках кіруюцца пенсіяй канкрэтнага чалавека.
«У цэлым на 2024 год у фондзе мяркуецца выдзеліць на выплату пенсіяў 22 мільярды рублёў. Але іх яшчэ трэба зарабіць праз выплату ўзносаў з заробкаў грамадзянаў, якія працуюць», – удакладніла Касцевіч.
Прадугледжанае падвышэнне заробкаў, паводле міністаркі, патрабуе дадатковых 166 млн рублёў на месяц і 1,8 млрд рублёў на 11 месяцаў.
Паводле афіцыйных звестак, сярэдні памер пенсіі ў Беларусі ў першым паўгоддзі 2023 года складаў 677 рублёў.
Зміцер Міраш belsat.eu
