На месцы будаўніцтва новага мосту на Нямізе распачалося бурэнне дадатковых свідравінаў для далейшага ўсталявання апораў, паведамляе БелТА са спасылкай на старшыню Менгарвыканкаму Уладзіміра Кухарава.
Для паскарэння працэсу бурэння свідравінаў на месца працаў дастаўленыя дзве трансфарматарныя падстанцыі для абагравання.
У свідравінах дыяметрам 1,2 метры будзе падрыхтаваны фундамент (залітае маналітнае збудаванне), усталяваныя бетонныя стойкі цэнтральных калонаў. То бок, пад цэнтральнай часткай мосту будуць дадатковыя падпоры аснавання.
«Але пры гэтым новы мост будзе больш лёгкі, не такі масіўны, як мінулы. І падымем яго крыху вышэй, чым было. Намалявалі ўжо праект падсветкі, – распавёў Кухараў. – У суботу на аб’ект паступаюць бэлькі будучага перакрыцця, яны былі вырабленыя ў паскораныя тэрміны».
Будаўніцтва новага мосту вядзецца кругласутачна.
Пуцеправод на праспекце Пераможцаў над вуліцай Нямігаю ў Менску абрынуўся ўначы 8 студзеня. Ніхто не пацярпеў. У сувязі са здарэннем Следчы камітэт распачаў дзве крымінальныя справы – паводле ч. 1 арт. 305 КК РБ («Парушэнне праектаў, абавязковых для выканання патрабаванняў тэхнічных нарматыўных прававых актаў падчас будаўніча-мантажных працаў») і ч. 2 арт. 428 КК («Службовая нядбайнасць»).
Пабудаваць новы мост менскія гарадскія ўлады абяцаюць цягам месяцу.
ГГ, belsat.eu
