У нямецкім выдавецтве «Edition Fototapeta» па-нямецку выйшла кніга пра палітзняволеных жанчын Беларусі. Выданне мае назву «Wenn du durch die Hölle gehst, dann geh weiter» («Калі вы ідзяце праз пекла, не спыняйцеся»).
«Улетку 2020 года тварам беларускай рэвалюцыі сталі жанчыны. Пасля сфальсіфікаваных прэзідэнцкіх выбараў яны вынеслі сваю краіну ў загалоўкі навінаў сусветнай прэсы. Рэжым адрэагаваў жорсткімі рэпрэсіямі, і цяпер нормай сталі ўсё больш працяглыя турэмныя тэрміны за ўсё больш абсурдныя «злачынствы». Але сярод паўсядзённага жыцця, поўнага пераследу, гвалту і тэрору, паказанні жанчын з турмаў Беларусі, сабраныя тут, ёсць знакам годнасці і вытрымкі», – гаворыцца ў анатацыі да кнігі.
У яе ўвайшлі сведчанні палітзняволеных жанчын Беларусі: Юліі Слуцкай, Марыі Калеснікавай, Кацярыны Андрэевай, Наталлі Хершэ, Вольгі Класкоўскай, Насты Лойкі, Марфы Рабковай, Алены Гнаўк, Ганны Комар, Вольгі Шпарагі, Інгі Ліндарэнкі.
Для ілюстрацыі на вокладку скарыстаны здымак з суда над журналісткамі «Белсату» Кацярынай Андрэевай і Дар’яй Чульцовай.
Складальніца кнігі – вядомая рэжысёрка і драматургіня Кардэлія Дворак, яна не раз выказвала салідарнасць з Беларуссю, была сімвалічнай хроснай некаторых палітвязняў.
У Еўрапарламенце 14 снежня адбыліся дэбаты пра лёс беларускіх палітвязняў, у выніку якіх была прынятая рэзалюцыя з патрабаваннем вызвалення ўсіх палітычных зняволеных, зняцця з іх усіх абвінавачанняў і кампенсацыі нанесенай шкоды.
Якуб Хруст belsat.eu
