Чуткі, што беларусаў, якія не паведамілі пра наяўнасць дазволу на жыхарства ці грамадзянства іншай краіны, могуць не пусціць на радзіму, пачалі з’яўляцца ў чатах, дзе абмяркоўваюць мінанне мяжы. Ці так гэта, высвятляла Zerkalo.io. Ні памежнікі, ні МУС адназначна адказаць не здолелі.
Беларусы цяпер абавязаныя паведамляць пра атрыманне дазволу на жыхарства ці грамадзянства ў іншай краіне. Даваць такую інфармацыю ці ўстрымацца, ужо некаторы час абмяркоўваюць у розных эмігранцкіх чатах. Дэпартамент грамадзянства і міграцыі МУС Беларусі заяўляў, што пакуль ніякай адказнасці для тых, хто не паведаміў, не ўводзілі. Аднак у беларускіх медыях пачалі з’яўляцца паведамленні, што беларускія памежнікі сталі правяраць у грамадзянаў пры выездзе з тэрыторыі Беларусі, ці паставілі яны на ўлік у Міністэрства ўнутраных справаў віды на жыхарства або пашпарты іншых краінаў.
Журналісты Zerkalo.io патэлефанавалі ў Дзяржаўны памежны камітэт Беларусі і ад імя шараговага беларуса запыталіся, ці ўдасца заехаць у краіну, калі не паведаміць пра ВНЖ ці другое грамадзянства. Работніца Памежнага камітэту адказала, што падобных указанняў у ведамства няма, памежнікі не кантралююць гэтага. Ці патрэбная для мінання мяжы нейкая даведка, што чалавек паведаміў пра свой ВНЖ ці грамадзянства, у камітэце не ведаюць і параілі звярнуцца ў МУС.
Паводле Zerkalo.io, падчас выдачы такой даведкі адной з беларусак у амбасадзе ў Берліне сказалі, што гэта «для мяжы, інакш, калі паедзеце назад, могуць быць праблемы».
Аднак ці абавязковая такая даведка, МУС таксама не ведае.
«У памежнікаў пытайцеся – гэта яны здзяйсняюць пропуск праз мяжу Рэспублікі Беларусь. Мы ахоўваем грамадскі парадак. Па даведку такую – у Аддзел грамадзянства і міграцыі раёну, дзе чалавек прапісаны. З ёю потым можна ездзіць», – адказаў дзяжурны работнік МУС.
У верасні з’яўляліся паведамленні, што беларусаў, якія не паведамілі пра наяўнасць замежнага ВНЖ ці грамадзянства, не выпускалі з Беларусі.
Абнаўленні да Закону аб грамадзянстве ўступілі ў моц 11 ліпеня. Сярод новаўвядзенняў быў прапісаны абавязак паведамляць у дзяржаўныя органы пра атрыманне ВНЖ ці грамадзянства іншай дзяржавы. Крайні тэрмін, да якога гэта трэба было зрабіць, – 10 кастрычніка. Якая будзе адказнасць і ці будзе ўвогуле для тых, хто не паведаміў, дасюль невядома.
Марыя Міхалевіч belsat.eu