Сенат Польшчы прыняў папраўкі да закону, якія спрашчаюць беларусам працэдуру легалізацыі
12 красавіка Сенат Польшчы прыняў без змен папраўкі да закону, дзякуючы якім у беларусаў з’явіцца магчымасць атрымліваць нацыянальныя (у тым ліку гуманітарныя) візы, знаходзячыся на тэрыторыі Польшчы, паведамляе сайт парламенту.
Акрамя таго, асобы, якія знаходзяцца на падставе віз, выдадзеных па гуманітарных прычынах, змогуць прадоўжыць сваё знаходжанне ў Польшчы на падставе гуманітарнага віду на жыхарства.
Грамадзяне Беларусі, якія будуць знаходзіцца ў Польшчы на падставе гуманітарнага віду на жыхарства, змогуць атрымаць польскі праязны дакумент.
У бліжэйшы час гэты дакумент паступіць на падпісанне да прэзідэнта Польшчы Анджэя Дуды, пасля чаго ён уступіць у сілу.
Гэтыя папраўкі ў заканадаўстве сталі магчымыя дзякуючы прапановам, якія вылучылі Цэнтр беларускай салідарнасці сумесна з Офісам Святланы Ціханоўскай.
МГМ, belsat.eu
