Працоўная група Арганізацыі Аб’яднаных Нацыяў у справе адвольных затрыманняў адказала на зварот праваабарончай арганізацыі «Freedom Now»: зняволенне беларускага блогера і журналіста Ігара Лосіка незаконнае.
У адказе працоўнай групы гаворыцца, што арышт і затрыманне Ігара Лосіка «былі заснаваныя выключна на ягонай журналісцкай дзейнасці і рэалізацыі ім свабоды выказвання думак і асацыяцыяў». Арганізацыя «Freedom Now» вітала рашэнне працоўнай групы, але адзначыла, што Лосік толькі адзін з мноства журналістаў, зняволеных цяпер у Беларусі.
Ігар Лосік за кратамі больш як тры гады. Да зняволення ён вёў сетку каналаў «Беларусь головного мозга» і працаваў кансультантам радыё «Свабода». Яго затрымалі 25 чэрвеня 2020 года. 14 снежня 2021 года Ігар быў асуджаны на 15 гадоў зняволення. За кратамі трымаюць і жонку Ігара Дар’ю Лосік, якой прысудзілі два гады пазбаўлення волі, абвінаваціўшы ў спрыянні экстрэмісцкай дзейнасці. На волі ў палітзняволеных сужэнцаў засталася маленькая дачка. У зняволенні Ігар Лосік рабіў спробы самагубства.
За кратамі ў Беларусі цяпер 32 журналісты. Агулам палітвязнямі прызнаныя 1489 чалавек.
Алесь Наваборскі belsat.eu