Спроба перавароту ў Нямеччыне, пратэсты ў Перу. Галоўныя падзеі свету за тыдзень

У Дзень ЗСУ прэзідэнт Украіны Уладзімір Зяленскі наведаў Славянск, што месціцца за 100 км на поўнач ад Данецку і кантралюецца ўкраінскімі войскамі. Зяленскі пабываў на пазіцыях ЗСУ побач з лініяй фронту, у ваенным шпіталі, а таксама запісаў віншавальны відэазварот вайскоўцам і ветэранам арміі Украіны.

На беразе Каспійскага мора ў Дагестане знайшлі 2,5 тыс. мёртвых цюленяў. Дакладныя прычыны гібелі жывёлінаў невядомыя, аднак рэгіянальнае Міністэрства прыроды мяркуе, што яны звязаныя з натуральнымі чыннікамі.

Мяшчанскі раённы суд Масквы прысудзіў апазіцыйнаму палітыку Іллю Яшыну 8,5 года пазбаўлення волі паводле справы аб «фэйках пра расейскае войска». Тэрмін толькі на 6 месяцаў меншы за той, што патрабавала пракуратура.

Прэзідэнт Перу спрабаваў распусціць парламент, каб пазбегнуць імпічменту. У Ліме 7 снежня прайшлі вулічныя акцыі як праціўнікаў прэзідэнта, так і ягоных прыхільнікаў. Былі сутыкненні з паліцыяй.

ЗША і Расея абмяняліся зняволенымі: баскетбольная зорка Брытні Грайнэр вызваленая з расейскай турмы ў абмен на вызваленне расейскага гандляра зброяй Віктара Бута, які адбываў турэмны тэрмін у ЗША. На здымку прэзідэнт ЗША Джо Байдэн і Шэрыл Грайнэр, жонка Брытні Грайнэр, размаўляюць з баскетбалісткай праз тэлефон. Побач з імі – віцэ-прэзідэнт Камала Гэрыс і дзяржсакратар ЗША Энтані Блінкен.

Абраная прэзідэнтка Беларусі Святлана Ціханоўская падчас свайго візіту ў Польшчу ўзяла ўдзел у дыскусіі «Беларусь на ростанях», што прайшла 8 снежня ў музеі гісторыі польскіх габрэяў «Polin». Імпрэза ладзілася з нагоды выхаду кнігі журналіста польскага выдання «Rzeczpospolita» і калумніста «Белсату» Руслана Шошына «Lodołamaczka Swiatłana Cichanouska» («Ледаколка Святлана Ціханоўская»).

Палестынец Іса Касісіе, апрануты як Санта Клаўс, прыняў позу для фатаграфіі на Аліўнай гары ў Ерусаліме.

Турысты наведваюць запаведнік матылькоў Сьера-Чынкўа (Sierra Chincua), Мексіка.

Раніцай 7 снежня каля трох тысяч паліцыянтаў прыйшлі з ператрусамі ў больш чым 130 дамоў і кватэраў па ўсёй Нямеччыне. Паліцыя ФРГ правяла затрыманні ўдзельнікаў групоўкі, што складалася з правых экстрэмістаў, райхсбюргераў, прыхільнікаў тэорый змовы і былых вайскоўцаў, якія, паводле версіі следства, планавалі дзяржаўны пераварот у Нямеччыне. З 52 падазраваных 25 асобаў затрымалі. У лік падазраваных уваходзіць 71-гадовы прынц Гайнрых XIII, нашчадак шляхецкага нямецкага роду.

Цела расейскага салдата ў полі непадалёк Ізюму.