Амаль 200 тыс. асобаў сталі ўцекачамі ў сектары Газа. Ізраіль раіць ім ісці ў Егіпет
Управа Арганізацыі Аб’яднаных Нацыяў для каардынацыі гуманітарных пытанняў (OCHA) абнавіла звесткі пра колькасць ахвяраў новай вайны паміж Ізраілем і сектарам Газа.
Паводле звестак на вечар 9 кастрычніка, у выніку нападу «Хамасу» на Ізраіль загінулі больш як 900 ізраільцянаў і замежных грамадзянаў. Сама меней 2616 чалавек атрымалі раненні.
У сектары Газа тым часам загінулі 687 палестынцаў і яшчэ 3800 атрымалі раненні. Таксама паведамляецца, што 17 палестынцаў, у тым ліку чацвёра дзяцей, загінулі ў выніку дзеянняў ізраільскай арміі на Заходнім беразе ракі Іярдан, 295 атрымалі раненні.
Масавае перамяшчэнне насельніцтва ў сектары Газа за апошнія 24 гадзіны дасягнула больш за 187 518 чалавек, чакаецца яго далейшае павелічэнне.
Ізраіль сказаў, куды ўцякаць палестынцам
Тым часам ізраільскае войска раіць жыхарам Газы перапраўляцца ў Егіпет.
«Я ведаю, што кантрольна-прапускны пункт «Рафах» усё яшчэ адкрыты», – заявіў на брыфінгу прадстаўнік Арміі абароны Ізраілю (Цагаль) Рычард Гэхт.
«Усім, хто можа выбрацца, я б параіў выйсці», – дадаў ён.
Пераход на егіпецкай мяжы з сектарам Газа часта выкарыстоўваецца жыхарамі сектару Газа падчас ізраільскіх аперацыяў супраць «Хамасу». Праўда, пасля ізраільскія вайскоўцы ўдакладнілі, што пераход закрыты.
Тэрарысты групоўкі «Хамас» з сектару Газа 7 кастрычніка пачалі маштабны напад на Ізраіль, у выніку краіна перайшла ў стан вайны. Ізраіль абвясціў аб аднаўленні кантролю над усімі паселішчамі каля Газы, аднак баі працягваюцца.
Якуб Хруст belsat.eu
