Улады непрызнанага Нагорнага Карабаху заявілі, што дамовіліся з Азербайджанам аднавіць перавоз гуманітарнай дапамогі па лачынскім калідоры – адзінай дарозе, якая злучае гэты рэгіён з Арменіяй. Пакуль жа першы цяжкавік выправіўся ў Сцепанакерт з тэрыторыі Расеі праз Азербайджан, перадае агенцтва «Armenpress».
З ініцыятываю cкіраваць у Нагорны Карабах гуманітарны груз выступіла Расея. Як гаворыцца ў паведамленні ўладаў непрызнанай рэспублікі, яны «дазволілі ўвозіць дапамогу праз Аскеран, зыходзячы з неабходнасці зліквідаваць вострыя гуманітарныя праблемы, выкліканыя ўведзенай Азербайджанам блакадаю».
У Баку пацвердзілі інфармацыю, што прапусцілі на сваю тэрыторыю цяжкавік Расейскага Чырвонага Крыжа, каб «задаволіць харчовыя патрэбы армянскага насельніцтва, якое пражывае ў Карабахскім эканамічным раёне Азербайджану».
Пры гэтым у Сцепанакерце сцвярджаюць, што дасягнутыя дамоўленасці наконт рэгулярнага транспартавання гуманітарных грузаў па лачынскім калідоры. Дапамогу будуць вазіць сіламі расейскіх міратворцаў і Міжнароднага камітэту Чырвонага Крыжа.
Напружанасць паміж Арменіяй і Азербайджанам абвастрылася, калі Баку закрыў рух па лачынскім калідоры – адзінай дарозе, якая злучае Нагорны Карабах з Арменіяй. Блакада прывяла да сур’ёзнага гуманітарнага крызісу ў рэгіёне, там не стае харчоў і лекаў.
Сяргей Крот belsat.eu