Павел Севярынец цяпер утрымліваецца ў турме ў Горадні. Пра гэта напісала жонка палітвязня Вольга Севярынец на сваёй старонцы ў «Фэйсбуку».
Як прайшоў этап са Шклова ў Горадню і ў якім стане цяпер Павел, невядома.
«Але ён жывы, гэта галоўнае, – піша Вольга Севярынец. – Вялікі дзякуй тым, хто гэтыя дні перажываў разам з намі і маліўся».
Вольга папярэдзіла, што лісты Паўлу не ад родных, хутчэй за ўсё, даходзіць не будуць, але пакінула адрас для падтрымання: турма № 1, камера № 16, вул. Кірава, 1, 230023, г. Горадня.
Пра Паўла Севярынца нічога не было вядома цягам двух тыдняў. Маці палітвязня Таццяна Севярынец выказвала думку, што Паўла перад этапам маглі кінуць у ШІЗА калоніі, дзе яшчэ ў красавіку яго паставілі на ўлік як злоснага парушальніка рэжыму.
Паўла Севярынца схапілі сілавікі каля ўласнага дому ў Менску 7 чэрвеня 2020 года, калі ехаў з выбарчага пікету на Камароўскім рынку. Пасля 75 содняў адміністратыўнага арышту яго так і не вызвалілі. Яму выставілі новае абвінавачанне паводле ч. 2 арт. 293 Крымінальнага кодэксу («Удзел у масавых закалотах»).
25 траўня 2021 года Магілёўскі абласны суд прыгаварыў Паўла Севярынца да сямі гадоў пазбаўлення волі ў калоніі ўзмоцненага рэжыму. Разам з ім судзілі яшчэ шасцёх палітвязняў. Суд праходзіў у закрытым рэжыме, не пускалі нават родных. Пасля абвяшчэння прысуду Севярынец звярнуўся да ўсіх, хто быў у зале: «Беларусь будзе вольнай! Верым! Можам! Пераможам!»
У красавіку бягучага году адміністрацыя папраўчай калоніі № 17 прызнала Севярынца «злосным парушальнікам рэжыму». Яго ўтрымлівалі ў ШІЗА некалькі месяцаў, а потым перавялі ў ПКТ на 3 месяцы. Вядома, што ў яго праз гэта пачаліся праблемы са здароўем. 21 чэрвеня сёлета ў Шклове адбыўся суд, на якім Паўлу Севярынцу змянілі рэжым утрымання. Суддзя Аляксандр Тараканаў пастанавіў перавесці палітыка ў турму тэрмінам на тры гады.
Марыя Міхалевіч belsat.eu