У еўрапейскіх краінах распаўсюджваецца новы варыянт амікрону – JN.1. Гэта мутацыя лініі BA.2.86.
Папярэдні варыянт амікрону BA.2.86 падаваўся навукоўцам не самым небяспечным, аднак ён атрымаў мутацыю, дзякуючы якой цяпер «умее» ухіляцца ад яшчэ большай колькасці чалавечых антыцелаў, якія змагаюцца з вірусам, што трапіў у арганізм. Таму варыянт JN.1 называюць самым устойлівым сярод усіх вядомых версіяў каронавірусу.
На дадзены момант амікрон JN.1 распаўсюджваецца ў Францыі і Вялікай Брытаніі і неўзабаве можа з’явіцца ў іншых краінах.
Паводле навукоўцаў, пакуль нельга прадказаць будучыню новага варыянту каронавірусу. Усё будзе залежыць ад імуннай абароны, з якой вірус сутыкнецца пры перадачы ад аднаго гаспадара да іншага. Справа ў тым, што цяпер, пасля пандэміі, большасць чалавецтва ўжо маюць імунітэт супраць каронавіруснай інфекцыі, атрыманы ў выніку вакцынацыі ці перанесенай хваробы. Дзякуючы гэтаму, новы варыянт у любым выпадку не будзе такім небяспечным, як першапачатковы.
Нягледзячы на імунітэт, эпідэміёлагі заклікаюць прышчапляцца. Джасцін Лэслэр, даследчык Універсітэту Паўночнай Караліны, прагназуе, што штогадовая вакцынацыя зможа выратаваць да 49 тысячаў жыццяў у год.
З кастрычніка 2022 года па верасень 2023-га ў ЗША ад COVID-19 памерлі больш за 80 тысяч чалавек – у 8 разоў больш, чым ад грыпу.
Версія каронавірусу, якую назвалі «амікрон», была выяўленая напрыканцы лістапада 2021 года. У 2023 з’явіліся мутацыі ХВВ і BA.2.86.
Паводле лекараў, амікрон можа стаць такой жа сезоннай інфекцыяй, як грып.
Марыя Міхалевіч belsat.eu
