Патрабуюцца: гулец у камп’ютарную гульню, лавец перлаў на падводнай ферме, дэгустатар халоднай кавы, адмысловец у мэмах, фатограф зорак і касманаўт-прапагандыст. Вашай увазе – самыя незвычайныя прапановы аб працы з усяго свету.
Сапраўды існуюць сэрвісы, якія прапануюць сеансы абдымання за грошы. Сярэдняя стаўка такога адмыслоўца – $ 80 за гадзіну. Але можна назваць свой кошт.
Каб падаць заяўку, трэба размясціць у сэрвісе свой здымак, быць пяшчотным і талерантным. Напрыклад, стваральнікі паслугі «Cuddlecomfort» сцвярджаюць, што маюць каля 400 тысячаў патэнцыйных кліентаў толькі ў ЗША.
Попыт на абдымальніц вышэйшы, бо большая частка кліентуры – мужчыны. Звычайна кліенты – самотныя асобы або тыя, хто пакутуе ад траўматычных праблемаў, інваліднасці ці эмацыйнага стрэсу. Ім проста патрэбныя абдымкі.
Абдымальнікі могуць знайсці працу ў такіх службах, як «Cuddle Up to Me», «The Snuggle Buddies», «The Snuggery».
Адукацыйная платформа «Нетология» шукае мэмолага: «Шукаюць гумарнога, з’едлівага і дасціпнага веселуна, які штодня завісае ў рылз, умее быць на чыле і расслабоне, замілоўваецца капібарамі». Патрабуецца «штодня шукаць свежыя мэмы на прасторах інтэрнэту» і «натхняць на неймаверныя дасягненні вучняў платформы».
Абвестка складзеная з цытатаў ды адсылак на мэмы і трэнды. Вы можаце ператварыць сваё пачуццё гумару ў працу і ствараць мэмы.
Шукаюць дасведчанага геймера, які апантана фанацее ад камп’ютарнай гульні «Mortal Kombat» і гатовы гуляць цэлыя дні. Заробак абяцаюць ад $ 725 за месяц.
Праца з дому, у абавязкі ўваходзіць гуляць у «Mortal Kombat», аналізаваць механіку і распрацоўваць стратэгіі для гульні.
Вакансія першая: праца ў кавярні на пляжы-аэрапорце на выспе Бара.
Пляж на выспе Бара – адзіная ў свеце пляжная ўзлётна-пасадачная паласа пры мясцовым лётнішчы. Аэрапорт працуе паводле графіку прыліваў. Улады выспы пастанавілі адкрыць там кавярню, якая, на іхную думку, можа адыграць значную ролю ў падтрыманні турыстычных аб’ектаў. Калі вы планавалі адчыніць кавярню – магчыма, гэтая прапанова для вас.
На беразе Атлантычнага акіяну, выспах Бара і Ватэрсэй, жывуць каля 1300 асобаў. На першы погляд, гэта ідэальнае месца для размеранага жыцця. Але аддаленасць таксама азначае праблемы з наданнем медычнай дапамогі. Да найбліжэйшага аддзялення неадкладнай дапамогі – гадзіна палёту ці шэсць гадзінаў язды.
Вакансія другая: шпіталь Святога Брэндана – малюсенькі шпіталь на тры ложкі, не абсталяваны нават рэнтгенаўскім апаратам. Тут мясцовы доктар спрабуе забяспечыць стабільны стан пацыентаў у экстранай сітуацыі, чакаючы хуткай дапамогі. Улады ўкладаюць вялікія сродкі, каб прыцягнуць сюды часовых спецыялістаў. Калі вы доктар і заўжды хацелі жыць на выспе – магчыма, гэта праца вашай мары.
У Маскве шукаюць касманаўта ў Цэнтр рыхтавання касманаўтаў імя Юрыя Гагарына. У гэтай аб’яве нас здзівіў пункт у патрабаваннях да патэнцыйнага касманаўта: «удзел у інфармацыйна-прапагандысцкай і камунікацыйнай дзейнасці як на Зямлі, гэтак і падчас касмічных палётаў».
Міжнародная асацыяцыя IACC-NA рыхтуе кансультантаў/дызайнераў для працы з колерамі.
Кансультант у колеры – гэта асобная прафесія. Такі адмысловец вывучае не проста рэакцыю чалавека на колер. Да тэмы ён падыходзіць з розных гледзішчаў і дысцыплінаў, якія, на першы погляд, могуць падацца не звязанымі паміж сабою. Тэорыя колеру, тэхналогія, біялогія, філасофія, псіхалогія, сацыялогія і мастацтва – усё гэта аспекты прыроды колеру.
Навучальная праграма IACC прадугледжвае паглыбленае вывучэнне ўсіх аспектаў: ад колеру ў маркетынгу да псіхалогіі колеру і стварэння аптымальнага архітэктурнага асяроддзя. Заняткі праходзяць онлайн.
Італійская вёска Аллёляй на Сардыніі прапануе да трох месяцаў жыць бясплатна для тых, хто працуе онлайн і гатовы дзяліцца сваймі ведамі з мясцовымі жыхарамі. Рэч у тым, што насельніцтва гэтай вёскі за 100 гадоў скарацілася з 2250 да 1300 асобаў. Мясцовыя ўлады распачалі праграму «Праца ў Аллёляі». Мэта – стварыць прывабнае месца для замежнікаў і спрыяць абмену інфармацыяй ды досведам паміж сельскімі жыхарамі і вялікім светам. Калі вы працуеце ў галіне тэхналогіяў, медыяў, фінансаў, архітэктуры, або вы артыст, пісьменнік, музыка ці навуковец – можаце скласці кароткую заяўку і ўзяць удзел у конкурсе. Асноўнае патрабаванне – мець працадаўцу за межамі Італіі.
Напрыканцы прапануем вам нечаканы факт: праца будаўніком сталася самаю шчаслівай у свеце – паводле даследавання «BambooHR» (кампанія, якая займаецца праграмным забеспячэннем для кіравання персаналам). Даследаваўшы каля 57 тысяч работнікаў у 160 арганізацыях, кампанія прыйшла да высновы: шчасце працаўнікоў агулам імкліва падае, што не скажаш пра будаўнікоў. Інфляцыя, крызісы на рынку працы, вяртанне ў офіс… Усё гэта не датычыць толькі сферы будаўніцтва. Выявілася, што работнікі гэтай галіны больш шчаслівыя ў параўнанні з офіснымі працаўнікамі.
А вы маглі б сваю працу назваць працаю мары?
Аліса Ганчар belsat.eu