«Белсат» падводзіць вынікі 409-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 8 красавіка чытайце ў нашым аглядзе.
Генеральны штаб Збройных сілаў Украіны паведамляе, што цягам апошніх содняў вайны сілы абароны адбілі больш за 60 атак праціўніка на ўсходзе краіны. Між тым інтэнсіўнасць баявых дзеянняў істотна адрознівалася ў залежнасці ад канкрэтнага ўчастку фронту.
На купянскім кірунку (паўночна-ўсходняя частка Харкаўскай вобласці, а таксама паўночны захад Луганскай) войскі РФ не праводзілі наземных аперацыяў, пры гэтым працягнулі абстрэльваць пазіцыі ЗСУ з артылерыі.
На суседнім ліманскім кірунку (паўднёвы захад Луганскай вобласці, а таксама поўнач Данецкай) працягваюцца лакальныя баі ўздоўж усёй лініі сутыкнення.
Аналітыкі праекту Deepstate адзначаюць актыўнасць расейцаў у лясах пад Крэмінной, асабліва на поўдні ад Дзібровы.
Генштаб ЗСУ піша, што атакі праціўніка ў Серабранскім лясніцтве не мелі выніку, як і спробы расейцаў наступаць каля Верхнякаменскага.
Расейскі ваенкор Сямён Пегаў узгадвае атакі войскаў РФ каля Цернаў і Неўскага. Ён таксама дадае пра атакі каля Белай Гары і Арэхава-Васільеўкі.
На бахмуцкім кірунку ў ваколіцах аднайменнага райцэнтру ўкраінскае камандаванне фіксуе няўдалыя атакі праціўніка на ўсходзе ад Багданаўкі і Іванаўскага.
У самім Бахмуце расейцы працягваюць ціснуць у бок захаду гораду.
Тэлеграм-канал «Два майора» піша, што Узброеныя сілы РФ наступаюць у ваколіцах чыгуначнага вакзалу, але ЗСУ не дазваляюць праціўніку дасягнуць хуткіх вынікаў.
Між тым кіраўнік ПВК «Вагнэр» Яўгеній Прыгожын заявіў, што ягоныя найміты змаглі ўклініцца ў пазіцыі ЗСУ каля вакзалу.
У Deepstate дапускаюць выраўноўвання лінія баявога сутыкнення па мясцовай чыгунцы.
Агулам за содні на гэтым кірунку ЗСУ адбілі больш за 20 атак праціўніка.
Паводле Генштабу ЗСУ, на аўдзееўскім і мар’інскім кірунках (на поўначы і захадзе ад Данецку) расейцы праводзілі наступальныя дзеянні каля Новакалінавага, Севернага, Первамайскага, Мар’інкі і Пабеды, але поспеху не мелі.
Пегаў адзначае, што інтэнсіўнасць расейскіх атак на абодвух кірунках істотна знізілася.
У Deepstate наадварот пішуць, што расейцы пры падтрымцы артылерыі распачалі маштабны наступ пад Аўдзееўкай, але выніку не мелі.
На шахцёрскім кірунку на паўднёвым участку фронту ў Данецкай вобласці войскі РФ засяродзіліся на вядзенні абароны і нанясенні артылерыйскіх удараў па пазіцыях ЗСУ.
Аналагічная сітуацыя назіраецца на запарожскім і херсонскім кірунках у аднайменных вобласцях.
Між тым неспакойна цягам содняў было на тэрыторыі анексаванага Крыму. Ранкам 8 красавіка Збройныя сілы Украіны паспрабавалі нанесці ракетны ўдар з аператыўна-тактычнага комплексу «Гром-2» па расейскіх аб’ектах на паўвостраве. У выніку ўкраінская ракета была збітая сіламі супрацьпаветранай абароны РФ у ваколіцах Феадосіі.
Тэлеграм-канал «Рыбарь» звязвае такія дзеянні ЗСУ з падрыхтоўкай да маштабнага контрнаступу.
Украінскае камандаванне паведамляе, што за содні было знішчана каля 580 расейскіх вайскоўцаў, у выніку чаго агульныя беззваротныя страты РФ дасягнулі 177 680 чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
ТМ belsat.eu
