Генеральная пракуратура Беларусі плануе да канца года перадаць у суд тры крымінальныя справы супраць памерлых асобаў, якіх лічаць датычнымі да генацыду беларускага народу. Пра гэта паведаміў генеральны пракурор Андрэй Швед.
Са словаў Андрэя Шведа, крымінальная справа нацысцкага карніка Уладзіміра Катрука будзе накіраваная ў суд у лістападзе. Яго падазраюць у спальванні Хатыні.
«Мы плануем адправіць першыя матэрыялы ў дачыненні Катрука. Гэта кат, які служыў ва ўкраінскім нацыяналістычным карным батальёне. Праца практычна завершаная. Цяпер мы ўдакладняем юрыдычныя працэдуры, у тым ліку шукаем ягоных сваякоў, для таго, каб іх апавясціць пра пачатак працэсу», – распавёў генпракурор.
Да канца года ў суд паступяць справы ў дачыненні яшчэ двух нацысцкіх злачынцаў.
Таксама ў наступным годзе Генпракуратура плануе перадаць у суды не менш як 15–20 справаў супраць памерлых асобаў.
Нагадаем, у ліпені гэтага года Лукашэнка падпісаў закон, паводле якога дазваляецца заводзіць крымінальныя справы супраць мёртвых і выносіць ім прысуды паводле 10 артыкулаў Крымінальнага кодэксу. Гэта артыкулы за генацыд, экацыд, міжнародны тэрарызм, падрыхтоўку або вядзенне агрэсіўнай вайны, прымяненне зброі масавага паражэння і іншыя ваенныя злачынствы. Згодна з законам, улады Беларусі плануюць выносіць прысуды ў справе аб «генацыдзе беларускага народу» ў гады Другой сусветнай вайны.
Алена Рувіна belsat.eu
