Альянс расследавальнікаў Беларусі заўважыў, што забіты кіроўца Захара Прылепіна 27-гадовы Аляксандр Шубін быў сярод вагнэраўцаў, якіх затрымлівалі ў Беларусі ў 2020 годзе. Ён нарадзіўся ў Луганску, удзельнічаў у баявых дзеяннях у Данбасе.
Забіты падчас замаху на пісьменніка і палітыка Захара Прылепіна кіроўца Аляксандр Шубін быў сярод 33 наймітаў ПВК Вагнэра, якіх затрымлівалі ў Беларусі напярэдадні прэзідэнцкіх выбараў у 2020 годзе. На гэта звярнуў увагу Альянс расследавальнікаў Беларусі.
Шубін нарадзіўся ў Луганску. Ваяваў у Данбасе, меў пазыўны Злы. Лічыўся ў базе «Міратворац».
У 2020 годзе 32 вагнэраўцаў затрымалі ў санаторыі ля Менску, аднаго – на поўдні краіны. Тады дзяржаўнае агенцтва БелТА называла іх баевікамі: «Сёння ноччу супрацоўнікі праваахоўных органаў Беларусі пад Менскам затрымалі 32 баевікоў замежнай прыватнай ваеннай кампаніі Вагнэра». У тым жа паведамленні быў спіс наймітаў, у якім пазначаны Аляксандр Шубін.
Расейскі «ваенкар» Сямён Пегаў апублікаваў у сваім Telegram-канале ўспаміны Прылепіна пра тыя падзеі: «Ён проста месца сабе не знаходзіў тады: Злы быў для ягонай сям’і кімсьці, каго можна параўнаць са старэйшым сынам ці малодшым шалёным братам».
Аўтамабіль Захара Прылепіна – пісьменніка, палітыка, удзельніка вайны ў Данбасе – узарвалі ў Ніжагародскай вобласці 6 траўня. Сам ён атрымаў, як паведамлялася, сур’ёзныя раненні, ягоны кіроўца загінуў. Сёння, паводле звестак губернатара, Прылепін апрытомнеў.
Сяргей Крот belsat.eu