Уладзімір Пуцін у пяты раз будзе балатавацца на прэзідэнцкую пасаду. Пра гэта паведамляюць адразу шэсць крыніц, але Крэмль не пацвярджае інфармацыю медыя.
Уладзімір Пуцін вырашыў удзельнічаць у прэзідэнцкіх выбарах у Расеі ў сакавіку 2024 года. Пуцін лічыць, што яму неабходна правесці Расею праз найнебяспечнейшы перыяд за апошнія дзесяцігоддзі, паведамляюць крыніцы «Reuters».
«Рашэнне ўжо прынятае – ён будзе балатавацца», – кажа адна з крыніц, знаёмая з хадою падрыхтоўкі да выбараў.
Інфарматар з дыпламатычных колаў адзначае, што Пуцін прыняў такое рашэнне нядаўна і што аб’ява пра гэта будзе зроблена ў найбліжэйшы час.
Прэс-сакратар Крамля Дзмітрый Пяскоў кажа, што расейскі кіраўнік ніякіх заяў пра выбары яшчэ не рабіў. «Ды і сама кампанія афіцыйна яшчэ не абвяшчалася», – адразае Пяскоў. У верасні ён заявіў, што калі Пуцін прыме рашэнне балатавацца, то ніхто не зможа скласці яму канкурэнцыю.
У выпадку перамогі на выбарах тэрмін кіравання Уладзіміра Пуціна будзе падоўжаны да 2030 года. 7 кастрычніка яму споўніўся 71 год.
Чакаць, што хтосьці складзе Пуціну сурʼёзную канкурэнцыю, сапраўды не даводзіцца. Кіраўнік ПВК «Вагнэр» Яўгеній Прыгожын, які набіраў папулярнасць сярод расейцаў, загінуў у авіякатастрофе. Гэта адбылося праз два месяцы пасля яго няўдалага бунту і паходу на Крэмль.
Расейскі апазіцыянер з прэзідэнцкімі амбіцыямі Аляксей Навальны знаходзіцца за кратамі. Яго арыштавалі 17 студзеня 2021 года. Навальны вяртаўся з Берліна ў Маскву, толькі адыйшоўшы пасля смяротна небяспечнага атручвання. Паводле звестак следчых «Bellingcat», да замаху на палітыка былі датычныя супрацоўнікі ФСБ Расеі.
Пра жаданне вылучацца ў прэзідэнты абвесціў дэпутат гарадской рады Даўгапруднага ад партыі «Справедливая Россия» Барыс Надзеждзін (раней уваходзіў у «Союз Правых Сил»). Чакаецца таксама вылучэнне заснавальніка партыі «Яблоко» Рыгора Яўлінскага, які не так даўно быў на прыёме ў Пуціна.
belsat.eu / Авер
