У сераду 6 верасня на Нацыянальным прававым інтэрнэт-партале з’явіўся Указ Лукашэнкі №248 ад 4 верасня «Аб парадку выдачы дакументаў і здзяйснення дзеянняў» – той самы, паводле якога беларускія амбасады і консульствы за мяжой больш не змогуць выдаваць беларусам пашпарты, а таксама здзяйсняць шэраг іншых натарыяльных дзеянняў. Указ уступае ў сілу з 7 верасня.
Адначасова беларускае Міністэрства замежных справаў дало каментар да Указу і растлумачыла, як цяпер мяняць пашпарты.
«Беларускія замежныя ўстановы больш не ўпаўнаважаныя займацца пытаннямі выдачы/абмену/працягу ўсіх відаў пашпартоў і ідэнтыфікацыйных карт. Указаныя дзеянні можна ажыццявіць на тэрыторыі Беларусі», – гаворыцца ў каментары.
Беларусы, якія аформілі ў амбасадзе пастаяннае пражыванне за межамі краіны і знаходзяцца на сталым консульскім уліку, змогуць звяртацца за абменам пашпарту ў галоўнае консульскае ўпраўленне МЗС ці ў падраздзяленне па грамадзянству і міграцыі УУС па месцы апошняй рэгістрацыі ў Беларусі. Беларусы, якія ніколі не жылі ў Беларусі, змогуць звяртацца па апошнім месцы жыхарства бацькоў.
Апастыль цяпер можна будзе паставіць у адным з дзяржаўных органаў непасрэдна на тэрыторыі Беларусі – у МЗС, Мінадукацыі, Мінюсце і т.п.
«Падача дакументу для прастаўлення апастылю магчымая толькі асабіста ўласнікам дакументу ці іншай асобай пры прад’яўленні даверанасці, аформленай у Рэспубліцы Беларусі», – зазначае МЗС.
Указ таксама забараняе здзяйсненне шэрагу дзеянняў па даверанасцях, аформленых за межамі Рэспублікі Беларусь. Цяпер пры здзяйсненні здзелак з маёмасцю, пры дзяржаўнай рэгістрацыі маёмасці, атрыманні даведак з ЗАГСу і падчас шэрагу іншых адміністратыўных працэдур трэба будзе звяртацца асабіста ці выкарыстоўваць даверанасць, аформленую на тэрыторыі Беларусі.
Звароты, якія беларусы паспелі падаць у амбасады да ўступлення ў сілу Указу, будуць разглядацца ў былым парадку, абяцае МЗС.
Амбасады працягнуць займацца пытаннямі грамадзянства, консульскага ўліку, афармленнем пастаяннага пражывання за мяжой, рэгістрацыяй актаў грамадзянскага стану (шлюб, развод). Таксама ў амбасадах ды консульствах Беларусі можна будзе атрымаць пасведчанне на вяртанне ў Рэспубліку Беларусь (выдаецца ў выпадку, калі пашпарт быў згублены, сапсаваны ці ў яго скончыўся тэрмін дзеяння, а таксама для нованароджаных дзяцей), засведчваць завяшчанні, згоды, адмовы, сапраўднасць копіяў і подпісаў на дакументах.
Марыя Міхалевіч belsat.eu