У Беларусі паводле палітычных матываў пераследуюць грамадзянаў Узбекістану і Казахстану
Беларускім праваабаронцам вядома пра як мінімум двух грамадзянаў Узбекістану і аднаго грамадзяніна Казахстану, асуджаных у нашай краіне паводле палітычных артыкулаў, паведамляе Праваабарончы цэнтр «Вясна».
У так званым «спісе экстрэмістаў» значыцца асуджаны за «абразу прадстаўніка ўлады» 62-гадовы грамадзянін Рэспублікі Узбекістан Ільдар Таўхітаў. Па стане на жнівень 2023 года было пазначана, што ён адбывае пакаранне.
За ўдзел у акцыях пратэсту ў 2022 годзе асудзілі грамадзяніна Узбекістана Віктара Новіка з жонкай Вольгай. Суд Ленінскага раёну прызнаў іх вінаватымі ў «актыўным удзеле ў дзеяннях, якія груба парушаюць грамадскі парадак».
У наваполацкай калоніі № 1 адбывае тэрмін жыхар Петрыкава, які мае грамадзянства Казахстану, Віталь Скударнаў. 11 лютага 2022 года яго асудзілі ў Гомлі за «распальванне іншай сацыяльнай варожасці», «абразу прадстаўніка ўлады» і «абразу прэзідэнта». Прысуджаны тэрмін пакарання невядомы.
Па стане на сакавік 2024 года ў спісе «экстрэмістаў» Міністэрства ўнутраных справаў 3960 асобаў. Самаму малодшаму яго фігуранту – 16 гадоў, самаму старэйшаму – 74.
Марыя Міхалевіч belsat.eu
