Раніцаю 5 верасня ў Кабуле каля расейскай амбасады адбыўся выбух, які ажыццявіў тэрарыст-смяротнік. У гэты час каля будынку сабралася чарга на атрыманне візаў, паведамляе афганскае агенцтва «Aamaj News».
Крыніца аднаго з расейскіх СМІ паведамляе, што ў момант выбуху выйшаў расейскі дыпламат, каб назваць імёны прэтэндэнтаў на атрыманне візы. Паводле папярэдніх звестак, прынамсі 20 чалавек загінулі ці атрымалі раненні. Таксама пацярпелі два расейцы – дыпламат і ахоўнік.
Паводле жыхара раёну, дзе адбыўся выбух, студэнта Кабульскага ўніверсітэту, салдаты талібаў заблакавалі раён і не дазваляюць нікому здымаць, што адбываецца: адбіраюць мабільныя тэлефоны і выдаляюць відэа. Студэнт бачыў на зямлі «некалькі трупаў».
«Не дабраўшыся да мэты, тэрарыст-смяротнік быў апазнаны і застрэлены аховаю расейскага пасольства», – паведаміў «Reuters» начальнік пастарунку Маўляві Сабір.
Пакуль ніякая з арганізацыяў не ўзяла на сябе адказнасць за выбух.
Расея – адна з нешматлікіх краінаў, якія захавалі пасольства ў Кабуле пасля таго, як талібы ўзялі краіну пад свой кантроль больш за год таму. Хаця Масква афіцыйна не прызнае ўраду талібаў, яны вядуць перамовы з афіцыйнымі асобамі.
Алена Рувіна belsat.eu