Кляшчы пакусалі ўжо сотні беларусаў. У якіх рэгіёнах цярпяць ад крывасмокаў больш за ўсё
За люты – сакавік 2024 года медыкі зарэгістравалі больш за 200 зваротаў наконт прысмоктвання кляшчоў, расказала энтамолаг Рэспубліканскага цэнтру гігіены, эпідэміялогіі і грамадскага здароўя Святлана Яшкова. Жыхары якіх рэгіёнаў Беларусі трапілі пад асабліва моцны ўдар?
Выступаючы на прэс-канферэнцыі БелТА «Сезон актыўнасці кляшчоў: прафілактыка і лячэнне клешчавых інфекцыяў у людзей і свойскіх жывёлінаў», Святлана Яшкова адзначыла, што колькасць укусаў штогод расце. За 2023-ы зафіксавалі больш за 31 000 выпадкаў, гэта больш за леташні паказнік на 11 %.
Такі ўсплёск актыўнасці кляшчоў звязаны з анамальна высокай тэмпературай у Беларусі. Цяпер яны спяць усяго два месяцы на год – у снежні і студзені.
Распаўсюд небяспечных захворванняў залежыць ад рэгіёну. Напрыклад, заражэнне барэліёзам адбываецца з большай доляй удзелу жыхароў Берасцейскай, Гарадзенскай, Менскай і Магілёўскай вобласцяў.
Усім вядомы клешчавы энцэфаліт у большай ступені актыўны на захадзе краіны – у Берасцейскай і Гарадзенскай вобласцях. На гэтыя два рэгіёны прыпадае каля 62 % усіх выпадкаў захворвання.
Усяго ж за мінулы год дактары дыягнаставалі больш як 2000 выпадкаў хвароба Лайма і больш за 200 выпадкаў клешчавага энцэфаліту. Прычым першым захворваннем можна заразіцца толькі праз іксодавых кляшчоў, а другім – нават пры ўжыванні ў ежу сырога казінага малака.
Энтамолаг нагадала, што прысмоктванне кляшчоў адбываецца пераважна ў лясных масівах (44 % усіх выпадкаў), сельскай мясцовасці і на дачных участках (35 %).
Як абараніцца ад укусаў кляшчоў?
Зразумела, лепш папярэдзіць укус. Для гэтага трэба прытрымлівацца некалькіх простых правілаў:
- пры паходзе ў мясцовасць, дзе ёсць рызыка сустрэць кляшчоў, варта надзець адпаведнае адзенне і затуліць аголеныя ўчасткі цела;
- апрацаваць адзенне і цела спецыяльным сродкам, які адпужвае і/або знішчае кляшчоў;
- перыядычна праводзіць самастойны і ўзаемны агляд адзення і цела.
Спецыялісты рэкамендуюць у выпадках, калі вы знайшлі на целе кляшча, як мага хутчэй звярнуцца да доктара. Пажадана зрабіць гэта ў першыя 72 гадзіны пасля ўкусу, каб пачаць прафілактычнае лячэнне.
Даследаванне кляшча метадам ПЛР на клешчавыя інфекцыі стала даступнае ў Менскім гарадскім цэнтры гігіены і эпідэміялогіі з 1 красавіка. Пра гэта ўстанова паведаміла ў сваім тэлеграм-канале.
ПЛР-тэставанне дапаможа пільна (цягам 24–48 гадзін) атрымаць інфармацыю наконт наяўнасці або адсутнасці актуальных інфекцыяў у кляшча. У прыватнасці, пацыенты, якія здалі кляшча на правяранне, могуць даведацца, ці быў клешч пераноснікам хваробы Лайма, клешчавага энцэфаліту, эрліхіёзу і анаплазмозу.
Станам на 1 красавіка 2024 года даследаванне кляшча метадам ПЛР будзе каштаваць:
- на барэліі – 43,5 рублёў;
- на вірус клешчавага энцэфаліту – 44,14 рублёў;
- на барэліі, вірус клешчавага энцэфаліту – 55,76 рублёў;
- на барэліі, вірус клешчавага энцэфаліту, анаплазмозу і эрліхіёзу – 69,98 рублёў.
Вынік даследавання карыстальнікі паслугі змогуць атрымаць на электронную пошту.
Ася Саковіч belsat.eu
