25 заданняў у падтрымку палітвязняў: ініцыятыва «Вольныя паштоўкі» стварыла Адвэнт-каляндар салідарнасці
Ініцыятыва «Вольныя паштоўкі» стварыла незвычайны спосаб падтрымкі беларускіх палітвязняў – Адвэнт-каляндар з тэматычнымі заданнямі на кожны дзень снежня да Божага нараджэння па грыгарыянскім календары.
«Тысячы палітзняволеных у Беларусі пазбаўленыя магчымасці адсвяткаваць Каляды і Новы год з сям’ёй. Каб дапамагчы ім адчуць святочную атмасферу, кожны дзень з 1 да 25 снежня мы будзем даваць вам заданні – а вы, выконваючы іх, будзеце падтрымліваць палітвязняў», – піша ініцыятыва.
Спампаваць каляндар можна па спасылцы, а потым сачыць за акаўнтам «Вольных паштовак» у Інстаграме. Там штодня будуць з’яўляцца заданні і парады па яго выкананні. Таксама можна дзяліцца фота і відэа, як вы выконваеце заданне – на сваіх старонках з хэштэгамі #adventpashtouki #вольныяпаштоўкі ці дасылаць ініцыятыве ў асабістыя паведамленні.
Сярод заданняў календару, напрыклад, такія: у падтрымку Марыі Калеснікавай і палітзняволеных жанчын скарыстацца чырвонай памадай, напісаць пасланне палітвязню на politzek.me, далучыцца да акцыі «Пошта Дзеда Мароза» і іншыя.
Той, хто выканае 18 і больш заданняў, атрымае ад «Вольных паштовак» узнагароду – цішотку альбо шопер.
«Вольныя паштоўкі» робяць Адвэнт-каляндар салідарнасці не першы год. Летась і ў 2021 годзе да Адвэнт-календара далучыліся больш за 100 чалавек.
«Вольныя паштоўкі» – ініцыятыва валанцёраў Офісу Святланы Ціханоўскай. Асноўны кірунак дзейнасці – выраб паштовак і мерчу з малюнкамі палітвязняў, якія потым адпраўляюцца за данаты па ўсім свеце.
Марыя Міхалевіч belsat.eu
