Вайсковец уратаваў дзвюх асобаў пры пажары ў вясковай хаце ў Жлобінскім раёне. Пра гэта паведамляе МНС Беларусі.
У Жлобінскім раёне 21-гадовы сяржант кантрактнай службы Аляксей Кушнер уратаваў двух чалавек падчас пажару. Увечары 1 студзеня ў вёсцы Радуша вайсковец ішоў віншаваць сваю бабулю з Новым годам, калі заўважыў дом у агні.
«У хадзе разбору ўстаноўлена, што да прыбыцця падраздзяленняў МНС Аляксей падбег да дому, убачыў у задымленым пакоі гаспадыню дому 1958 года нараджэння і грамадзяніна 1987 года нараджэння, які быў у гасцях, і ўратаваў іх праз аконны праём», – гаворыцца ў паведамленні МНС.
Адзначаюць таксама, што жанчыну пасля агляду брыгадаю хуткай медычнай дапамогі шпіталізавалі ва ўстанову аховы здароўя, яна атруцілася прадуктамі гарэння. Пажар зліквідавалі ратавальнікі. У выніку знішчаны дах, пашкоджанае столевае перакрыццё, сцены і маёмасць у драўлянай хаце. Разгляданая версія прычыны пажару – неасцярожнае абыходжанне з агнём пры курэнні.
Міністэрства абароны ўдакладняе, што геройскі ўчынак на пажары здзейсніў намеснік камандзіра ўзводу, начальнік радыёстанцыі 336-й рэактыўнай артылерыйскай брыгады, сяржант кантрактнай службы Аляксей Кушнер. У гэты ж вечар міністр надзвычайных сітуацыяў Вадзім Сіняўскі падчас тэлефоннай размовы падзякаваў Аляксею Кушнеру за ўратаваныя чалавечыя жыцці, адзначыўшы неабыякавасць і мужнасць, праяўленыя пры гэтым, і павіншаваў з Новым годам.
Антон Тачняк belsat.eu
