Пасля ператрусу затрымалі галоўнага рэжысёра Віцебскай тэлерадыёкампаніі Сяргея Арлова
У чацвер 30 лістапада сілавікі прыйшлі ў будынак Віцебскай ТРК, правялі ператрус у кабінеце галоўнага рэжысёра Сяргея Арлова, пасля чаго затрымалі яго. Яшчэ адзін ператрус правялі ў Арлова ўдома, паведамляе тэлеграм-канал «Витебск, я гуляю».
Што ставіцца ў віну рэжысёру – невядома.
Сяргей Арлоў – дырэктар тэлеканалу «6ТВК» і арганізатар рэгіянальнага тэлеканалу «Віцебск». Акрамя таго, стваральнік шматлікіх дакументальных фільмаў і праграмаў. Найбольш вядомая ягоная стужка «Еўфрасіння Полацкая», а ягоны цыкл «Сямейны альбом» стаў пераможцам Міжнароднага каталіцкага фестывалю хрысціянскіх фільмаў і тэлепраграмаў «Magnificat».
Сяргей – акадэмік Еўразійскай акадэміі тэлебачання і радыё. Быў арганізатарам тэлемарафону для збору сродкаў на аднаўленне Свята-Пакроўскага кафедральнага сабору.
Марыя Міхалевіч belsat.eu
