Беларускі КДБ прызнаў сайт Саюзу палякаў Беларусі glosznadniemna.pl «экстрэмісцкім фармаваннем», прыкмеціла «Вясна».
Адпаведнае рашэнне было прынятае яшчэ 26 сакавіка, але вядома пра яго стала толькі цяпер.
Як адзначае Камітэт дзяржкантролю, дачыненне да сайту маюць Анджэй Пісальнік і Інна Тодрык-Пісальнік.
На пачатку 2022 года сайт Саюзу палякаў Беларусі ўжо быў унесены ў спіс «экстрэмісцкіх матэрыялаў» на падставе рашэння суду Ленінскага раёна Горадні ад 30 снежня 2021 года.
Нагадаем, што наступ на Саюз палякаў Беларусі ўлады рэжым Аляксандра Лукашэнкі пачаў з сакавіка 2021 года. Генеральная пракуратура тады распачала крымінальную справу супраць старшыні незарэгістраванага Саюзу палякаў у Беларусі Анджэлікі Борыс ды іншых асобаў арганізацыі. Іх абвінавацілі ў рэабілітацыі нацызму і апраўданні генацыду беларускага народу паводле ч. 3 арт. 130 КК («Наўмысныя дзеянні, накіраваныя на распальванне нацыянальнай і рэлігійнай варожасці праз прыкмету нацыянальнай, рэлігійнай, моўнай ды іншай сацыяльнай прыналежнасці, а таксама праз рэабілітацыю нацызму, учыненыя групай асобаў»).
Тады з ператрусамі прыйшлі да гарадзенскага журналіста і сябра Саюзу палякаў у Беларусі Анджэя Пачобута. Акрамя таго, былі арыштаваныя Ірына Бярнацкая і Марыя Цішкоўская з Саюзу палякаў, а таксама Ганна Панішава, актывістка польскай меншасці з Берасця. Траім апошнім удалося пакінуць Беларусь у 2021 годзе, дзякуючы намаганням польскіх уладаў, аднак без магчымасці вярнуцца ў краіну свайго грамадзянства, Беларусь.
Праз два гады, у пачатку красавіка 2023 года, з Анджэлікі Борыс знялі хлуслівыя абвінавачанні. Аднак Андрэй Пачобут усё яшчэ застаецца за кратамі, яму прысудзілі 8 гадоў зняволення. З 26 лютага 2024 года пра яго няма ніякіх звестак.
Раман Шавель belsat.eu