Дубай затапіла надзвычай моцнай залевай: за дзень выпала 2,5 гадавой нормы ападкаў

Найбуйнейшы горад Аб’яднаных Арабскіх Эміратаў перажыў патоп, нетыповы для пустэльні. Дзяржаўнае інфармагенцтва Эміратаў WAM паведаміла, што за дзень 16 красавіка выпала 254,8 мм ападкаў – рэкорд за 75 гадоў назіранняў. А як піша «Associated Press», гадавая норма для Дубаю – 94,7 мм.

У Дубаі, расказвае CNN, дарогі ператварыліся ў рэкі так хутка, што кіроўцы мусілі ўцякаць з машынаў. Вада затапіла дамы і прадпрыемствы, самалёты ледзь не плылі ў другім паводле загружанасці аэрапорце свету.

Дубай размешчаны ў сухім і гарачым клімаце, ападкі там нячастыя. Таму шмат дзе адсутнічае інфраструктура, каб спраўляцца з паводкамі. Але праз змену клімату залевы здараюцца там, дзе іх практычна не бывала.

Штармавая сістэма, якая цяпер працінае Аравійскі паўвостраў, таксама прыносіць надзвычай вільготнае надвор’е ў Аман і на поўдзень Ірану.

Пра ахвяраў патопу ў Дубаі не паведамляюць. Але ў суседнім Амане за апошнія дні 18 асобаў загінулі ад патопаў, у тым ліку 10 школьнікаў.

Алесь Наваборскі belsat.eu