Міжнародны валютны фонд (МВФ) змяніў у лепшы бок прагноз пра перспектывы росту беларускай эканомікі ў 2024 годзе. Тым не менш, гэты прагноз адстае ад тэмпаў, якія прадказваюцца для сусветнай эканомікі. А таксама ад таго, што ад беларускага ВУП чакаюць улады краіны.
У МВФ мяркуюць, што ВУП Беларусі сёлета вырасце на 2,4 %. Гэта на 1,1 працэнтныя пункты больш за кастрычніцкі прагноз. Фонд таксама прагназуе, што інфляцыя ў Беларусі складзе 6,3 %, дэфіцыт балансу бягучага рахунку – 0,5 % ВУП, а беспрацоўе – 3 %.
У 2025 годзе рост беларускай эканомікі можа замарудзіцца да 1,1 %, інфляцыя складзе 6,5%, а дэфіцыт балансу бягучага рахунку – 1,3 % ад ВУП.
Пры гэтым базавы прагноз МВФ для сусветнай эканомікі складае 3,2 % у 2024 і 2025 гадах.
Прагноз МВФ прадказвае лепшыя перспектывы для беларускай эканомікі за Сусветны банк (1,2 %), даследчы цэнтр BEROC (1,6 %) і нават Еўразійскі банк развіцця (2 %). Тым не менш, істотна адстае ад таго, што сабе запланавалі ўлады Беларусі – 3,8 %.
Якуб Хруст belsat.eu
