Тэмы праграмы:
Канкурэнтаў Лукашэнкі набралася ажно чатырнаццаць чалавек – столькі ініцыятыўных групаў для вылучэння кандыдатаў на прэзідэнцтва зарэгістравала беларуская Цэнтральная выбарчая камісія. І хоць з вялікай верагоднасцю гэтыя прэзідэнцкія выбары пройдуць без міжнародных назіральнікаў, ёсць аптымісты, якія вераць у справядлівы падлік галасоў. На што спадзякаюцца кандыдаты і як за выбарчай кампаніяй назіраюць вонкавыя сілы? Высвятляў Зміцер Міцкевіч.
Крызіс, як вядома, заўсёды адчыняе вакно магчымасцяў. І для афіцыйнага Менску гэтае вакно прыадчыняюць у Бруселі. З’явіліся сігналы, што Менск мае ўнікальную магчымасць змяніць падыход да еўрапейскай палітыкі. Пра што гаворка? Сюжэт Аркадзя Несцярэнкі.
Беларускія дзяржаўныя медыі следам за Аляксандрам Лукашэнкам прымяншаюць небяспеку COVID-19. Чаму яны ўпарта ідуць напралом? Як гэта паўплывае на выбары? Інтэрв’ю з Андрэям Елісеевым, палітолагам, дырэктарам даследчага цэнтру «EAST». Эксперт аналізуе і каментуе дзеянні ўладаў Рэспублікі Беларусь у супрацьдзеянні эпідэміі.
Тое, пра што год таму і размовы не вялося, адбываецца: у нафты, якая плыве ў Беларусь, расейскі – толькі танкер. Амерыканская сыравіна разбаўляе расейскую манаполію. У той жа час танны беларускі бензін у рэкордных аб’ёмах паліўся на расейскі рынак. Дамоўленасці гэтага не забараняць, але Пуцін – супраць. У Беларусі ідзе перабудова энергетычнай стратэгіі, але нафтаперапрацоўчыя заводы працуюць у мінус? Высвятляла Юлія Цяльпук.
Краіны Еўразвязу працягваюць паслабляць каранцін. Паралельна ў розных краінах адбываюцца акцыі пратэсту, прычым некаторыя пратэстоўцы дамагаюцца найхутчэйшага зняцця каранціну, а некаторыя – наадварот, патрабуюць не спяшацца адкрываць школы ды іншыя публічныя месцы, бо баяцца чарговых выбухаў хваробы. У пратэстах разбіралася Наста Ільіна.
Міжнародны тэлечасопіс «ПраСвет» з Алінаю Коўшык ды Сяргеем Пелясою глядзіце штотыдзень у пятніцу а 21:20. Падпісвайцеся на «Прасвет» у профілях у Facebook і «Аднакласніках»! Глядзіце нас праз спадарожнік «Астра 4A» (ранейшая назва «Sirius 4»), онлайн, на YouTube-канале і на нашай старонцы.
Калаж з фота: Natalia Fedosenko / TASS / Forum