Год навучання замежнай мове каштуе каля 1300 беларускіх рублёў. За гэты час кожнай мовай можна авалодаць на прыстойным узроўні. І беларусы гатовыя плаціць за тое, каб навучыцца новаму.
«Часам лагісты ходзяць ці праграмісты, у якіх ёсць кліенты ў Польшчы, і ім трэба хаця б мінімальна ведаць мову», – кажа Ірына Зімнева, дырэктарка Цэнтру славянскіх моваў і культураў.
Часцей за ўсё беларускую мову вывучаюць замежнікі, якія прыехалі ў Беларусь. Пры гэтым у адукацыйным цэнтры паміж сабой настаўнікі размаўляюць на роднай мове.
«Я беларускамоўная, адпаведна, я набіраю супрацоўнікаў, я правожу з імі сумоўе па-беларуску, і неяк атрымліваецца, што аўтаматычна людзі звяртаюцца да мяне па-беларуску», – распавядае Ірына Зімнева.
Неўзабаве ў краіне пройдзе перапіс насельніцтва. Сярод пытанняў будуць і тыя, што датычаць роднай мовы. Падтрымайце кампанію «Белсату» «Беларускамоўныя» – не забудзьцеся пазначыць роднаю мовай – беларускую. Ад колькасці людзей, якія дадуць такі адказ, будзе залежаць далейшая палітыка дзяржавы.
Сярод курсаў славянскіх моваў самы вялікі попыт – на польскую. На другім месцы паводле папулярнасці ў беларусаў – курсы чэшскай. А на трэцім – славацкай.
«Ідуць людзі, якія маюць грошы. Яны ж разумеюць, што за гэта ўсё трэба плаціць. Я не скажу, што беларусы ў гэтым плане нейкія… ім гэтага не трэба, яны не хочуць развівацца. Да нас прыходзяць людзі, якія сапраўды хочуць нечаму навучыцца», – дадае Ірына Зімнева.
Ганна Лахоўская выкладае беларускую і чэшскую мовы. Самай маленькай ейнай вучаніцы было 5 гадоў, а найстарэйшай – за семдзесят. Вучыцца ідуць розныя людзі, розных узростаў і з рознымі інтарэсамі.
«Я бачу, што бацькам не шкада аддаваць грошы на адукацыю. І гэта вельмі прыемна, бо яны разумеюць: калі ўкладуць у дзіцёнку зараз, то потым гэта адаб’ецца. Дапаможа і ім, і бацькам у жыцці», – кажа Ганна Лахоўская, выкладчыца беларускай і чэшскай моваў.
Найпапулярнейшая сярод усіх моваў – вядома, англійская. Адпаведна, за яе навучанне беларусы гатовыя плаціць найчасцей. Англійскую вучаць, каб здаць ЦТ, змяніць працу, падарожнічаць.
Мікалай Янкойць – з адукацыі праграміст. Выкладае курс фронт-энду – іншымі словамі, вучыць беларусаў распрацоўваць сайты. У адукацыйным цэнтры «Адукар» курсы IT каштуюць каля 200 рублёў на месяц. Прыходзяць на іх нават беларусы, якія раней не сутыкаліся з камп’ютарнай сферай. Навучанне цягнецца паўгода. Найлепшым выкладчыкі дапамагаюць знайсці працу.
«Я думаю, што попыт расце і будзе яшчэ хутчэй расці ў бліжэйшыя гады. Шкада, што толькі дадатковая. А агульная адукацыя такім попытам не карыстаецца. Бо ўсе прызвычаіліся, што яна абавязковая і сумная. А ў дадатковай адукацыі нічога сумнага няма», – кажа Мікалай Янкойць.
Калі ў Менску можна знайсці курсы на любы густ, то ў рэгіёнах з гэтым складаней. Не хапае школаў і выкладчыкаў. Людзі з гарадоў-спадарожнікаў ездзяць па адукацыю ў сталіцу. А вось для жыхара, напрыклад, Белаазёрску шлях да навучання будзе доўгім.
«Калі з англійскай – больш-менш, бывае, што ў невялічкіх гарадах каля Менску з’яўляюцца курсы, але IT ці школьныя прадметы, як правіла, вывучаюць тут. Бывае, што прыязджаюць з Віцебску, там не хапае курсаў, ці нават з Гомля, Магілёвя», – распавядае Уладзіслаў Варановіч, дырэктар развіцця адукацыйнага праекту «Адукар».
У Беларусі існуюць розныя віды дадатковай адукацыі. Акрамя моўных курсаў можна пайсці на прафесійныя. І атрымаць, напрыклад, прафесію цырульніка. Вельмі папулярныя – бізнес-трэнінгі, падчас якіх развіваюцца працоўныя навыкі спецыялістаў. Таксама існуюць дзяржаўныя адукацыйнай праграмы павышэння кваліфікацыі работнікаў і перападрыхтоўкі кадраў. Напрыклад, пасля атрымання сярэдняй або вышэйшай адукацыі можна паступіць у ВНУ і ў скарочанай форме атрымаць другую вышэйшую адукацыю.
Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце. Далучайцеся да нашых старонак ў Facebook ды Одноклассниках. Падпісвайцеся на нашу рассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».