Нацыянальнае прымірэнне – адзіны шлях выратавання Беларусі, і дамаўляцца з лукашыстамі давядзецца, мяркуе Андрэй Ягораў. Прымірэнне магчымае толькі пасля прызнання Лукашэнкам віны і ягонага пакаяння, лічыць Юрый Губарэвіч. Хто мае рацыю?
За апошні месяц тэма нацыянальнага прымірэння пасля словаў нобэлеўскага лаўрэата Алеся Бяляцкага і адкрытага ліста рэдактара газеты «Народная воля» Іосіфа Сярэдзіча зрабілася актуальнай. Але ці магчымае гэтае нацыянальнае прымірэнне, і як жыць побач і разам з амапаўцамі ды ябацькамі? Пра гэта новае выданне праграмы «Двубой» з Віталём Цыганковым.
Палітык Андрэй Ягораў лічыць, што альтэрнатывы нацыянальнаму прымірэнню няма, і да яго мы рана ці позна дойдзем, бо немагчыма выключыць з ліку беларусаў нават тых, хто рабіў беззаконне і злачынствы.
«Нават калі мы збіраемся судзіць людзей, то сама магчымасць суда – яна мяркуе, што гэтыя людзі належаць да нашага народу і да нашай нацыі. І тады гэты суд можа быць структурай таго, як нацыя праходзіць ачышчэнне і прымірэнне», – зазначае Андрэй Ягораў і падкрэслівае неабходнасць падрыхтавацца да гэтага.
Аднак палітык Юрый Губарэвіч лічыць, што цяпер прымірэнне немагчымае, бо канфлікт яшчэ не завершаны, а беларусы, якія прагнулі свабоды ў 2020 годзе, не здрадзілі сабе дасюль.
«На маё глыбокае перакананне, вінаваты бок тут адзін. Гэты бок – рэжым, Лукашэнка, людзі ў сілавых структурах, якія яго падтрымліваюць. І калі казаць пра прымірэнне – так, яно магчымае. Прымірэнне праз прызнанне віны тым бокам і праз пэўнае пакаянне. І натуральна, што яшчэ і праз пакаранне. Гэтага аспекту таксама ніхто не адмяняў. Ці гатовы Лукашэнка сёння пайсці на прызнанне віны і пакаянне перад беларускім грамадствам – цалкам відавочна», – тлумачыць Юрый Губарэвіч.
Таксама палітык дадае, што тэза пра прымірэнне абапіраецца на памылковую тэзу пра падзел беларускага народу, якога, лічыць Губарэвіч, насамрэч няма, а Лукашэнка абапіраецца выключна на «купку сілавікоў».
Чаму Лукашэнка адмаўляецца ісці на перамовы? Ці можа гэта змяніць пазіцыя Захаду? Няўжо Беларусі прыйдзецца перажыць уласны Нюрнбэрг, і што нас чакае ў выпадку перамоваў Украіны і Расеі пасля вайны? Глядзіце ў новым выданні праграмы «Двубой» з Віталём Цыганковым.
Госці праграмы «Двубой» з Віталём Цыганковым:
Андрэй Ягораў, палітолаг, спікер Каардынацыйнай рады
Юрый Губарэвіч, старшыня руху «За свабоду»
Праграму «Двубой» глядзіце праз спадарожнік «Астра 4A» (ранейшая назва «Sirius 4»), онлайн, у архіве на нашай старонцы або на YouTube
