Блогерка Данута Хлусня трапіла ў цяжкую сітуацыю: ейнага сына Багдана на пешаходным пераходзе збіў аўтамабіль, дзве нагі зламаныя. Але пракуратура ў ДТЗ абвінаваціла падлетка. Трэба дапамога з рэабілітацыяй і юрыдычная дапамога для здабыцця справядлівасці.
Наталля Багданава, вядомая як Данута Хлусня, вымушаная была з сынам Багданам спачатку з’ехаць ва Украіну, а пасля пачатку вайны – у Польшчу. Але тут, у Варшаве, 7 кастрычніка з хлопчыкам здарылася жудаснае: ён ішоў праз пешаходны пераход, калі яго збіў аўтамабіль. У такой сітуацыі, калі Багдану спатрэбілася правесці некалькі аперацыяў цягам 6 гадзінаў на абедзвюх зламаных нагах, сям’я трапіла ў вельмі складаную сітуацыю. А ўсё праз тое, што пракуратура вынесла рашэнне: у аварыі вінаваты хлопчык, а не кіроўца чорнага джыпа.
«Пракуратура вынесла рашэнне, што маё дзіця вінаватае, таму мы не маем ніякай магчымасці ні на якую страхоўку, ні на якую кампенсацыю», – дзеліцца Наталля.
Багдан пасля аварыі не адчуваў ног, а таксама доўгі час перасоўваўся на інвалідным вазку. Цяпер ён паволі рухаецца ў артэзах. Кіроўца ж, які збіў яго, ні разу не паспрабаваў звязацца з Наталляй і пацікавіцца лёсам Багдана, а ў адказе пракуратуры ягонае імя адсутнічае, ён называецца проста кіроўцам «лексуса».
Наталля хоча дамагчыся справядлівасці. Для гэтага ёй трэба юрыдычная дапамога. Таксама праз фонд «BYSOL» яна звярнулася да беларусаў для збору сродкаў на рэабілітацыю 13-гадовага Багдана, які ўспамінае: «Не хацелася паказвацца на людзях, каб мяне бачылі ў такім стане».
Як Наталля і Багдан пражылі паўгода пасля аварыі? З якімі складанасцямі яны сутыкнуліся, і чаму жанчыне давялося зрабіцца не толькі медсястрой, але і настаўніцай? Як сам хлопчык спраўляецца са сваім становішчам і чаму цяпер марыць быць юрыстам? Глядзіце ў новым выданні праграмы «Беларус беларусу».
Калі вы хочаце падтрымаць нашых герояў, лістуйце нам: belarus2belarus@gmail.com
Далучайся да нашых суполак у Facebook ды Instagram.
І памятайце: беларус беларусу – любоў, падтрымка і перамога. Дзе мы разам – там і Беларусь.
Праграму «Беларус беларусу» глядзіце на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.
