Міліцыя Віцебскага раёну распачала адміністратыўную справу супраць журналістаў Алены Шабуні і Змітра Лупача за сюжэт, які выйшаў на тэлеканале «Белсат».
Справа распачатая паводле артыкула 22.9 КаАП – парушэнне заканадаўства пра медыі. Суд мае адбыцца 12 снежня.
Перадаючы справу ў суд міліцыянты нават не апыталі Алену Шабуню, якая зараз знаходзіцца ў ад’ездзе.
У самім сюжэце распавядаецца пра тое, што жыхары вёскі Шэвіна пад Віцебскам скарысталіся парламенцкімі выбарамі ў незвычайны спосаб: яны заявілі мясцовым уладам, што байкатуюць галасаванне, бо чыноўнікі іх ігнаруюць ды абыходзяцца з імі па-хамску.
За 15 кіламетраў ад Віцебску на беразе возера Шэвіна стаіць санаторый Лётцы, які належыць дзяржаўнай Федэрацыі прафсаюзаў. Жыхары вёскі Шэвіна гэты санаторый будавалі, у ім працавалі па 40 гадоў, а з пачатку верасня ім забаранілі карыстацца дарогай у суседнія Малыя Лётцы.
Для Змітра Лупача гэта ўжо чацвёрты судовы працэс за 2019 год, для Алены Шабуні – другі.
МГ belsat.eu