Улады забаранілі 15 мітынгаў супраць акумулятарнага заводу, запуск якога павінен адбыцца ў траўні, «праз кляшчоў».
Берасцейскія актывісты звярнуліся да ўладаў з просьбай дазволіць правесці з 13 па 17 траўня 15 мітынгаў на пляцоўцы каля сцэны ў парку Воінаў-інтэрнацыяналістаў.
У сваім адказе заяўніку Раману Кісляку ўлады паведамілі, што менавіта ў гэтыя дні ў парку запланаваныя антыкляшчавыя мерапрыемствы.
«Нам адмаўляюць у любым выпадку, таму мы падаем заявы на правядзенне мітынгаў ува ўсе магчымыя месцы і ўсе магчымыя гадзіны, каб праверыць, якія яшчэ прычыны для адмовы яны прыдумаюць. Гэтым разам нам адмовілі, бо ў парку, маўляў, плануюцца мерапрыемствы супраць кляшчоў», – распавёў «Белсату» берасцейскі актывіст Аляксандр Кабанаў.
Больш за год берасцейцы пратэстуюць супраць пабудовы акумулятарнага заводу «iPower» у свабоднай эканамічнай зоне «Берасце». Жыхары гораду сцвярджаюць, што прадпрыемства можа негатыўна паўплываць на экалогію ў рэгіёне.
Са студзеня мінулага года да сёння актывісты падалі больш за сотню заяваў на правядзенне ў Берасці і Берасцейскім раёне акцыяў пратэсту. Улады санкцыянавалі толькі мітынг «Берасцейкі супраць свінцу» у красавіку 2018-га. Тады ў парк Воінаў-інтэрнацыяналістаў прыйшло каля дзвюх тысячаў чалавек.
ДД belsat.eu